سیکورٹی فورسز کا بلوچستان میں سرچ آپریشن، 6 دہشتگرد ہلاک

سیکورٹی فورسز نے بلوچستان کے علاقے پاروم میں سرچ آپریشن کے دوران 6 دہشتگردوں کو ہلاک کردیا ہے۔ مارے گئے دہشتگرد سیکورٹی فورسز پر حملوں میں ملوث تھے۔

پاک فوج کے شعبہ تعلقات عامہ (آئی ایس پی آر) کی جانب سے جاری ہونے والے بیان کے مطابق سیکورٹی فورسز نے بلوچستان کے علاقے پاروم میں ایک کارروائی کے دوران کالعدم بلوچستان لبریشن فرنٹ (بی ایل ایف) کے 6 دہشت گرد کو ہلاک کردیا ہے۔

یہ بھی پڑھیے

ہرنائی میں تعمیراتی کمپنی کے کیمپ پر حملہ، دو مزدور جاں بحق

گرے لسٹ سے نکلنے کا عمل اکتوبر میں مکمل ہوگا جشن منانے کی ضرورت نہیں، حنا ربانی کھر

ڈی جی آئی ایس پی آر کے مطابق سیکیورٹی فورسز نے دہشت گردوں کی موجودگی کی اطلاع پر بلوچستان کے علاقے پاروم کے قریب سینٹرل مکران ماؤنٹین رینج میں آپریشن کیا۔

ترجمان آئی ایس پی آر کا کہنا ہے کہ جب سیکورٹی فورسز نے خفیہ اطلاع پر علاقے میں کلیئرنس آپریشن شروع کیا تو دہشت گردوں نے اپنے ٹھکانے سے بھاگنے کی کوشش کی اور سیکیورٹی فورسز پر فائرنگ کردی۔

ترجمان پاک فوج کے مطابق سیکورٹی فورسز اور دہشتگردوں کے درمیان فائرنگ کے تبادلے میں کالعدم بی ایل ایف سے تعلق رکھنے والے 6 دہشت گرد مارے گئے۔

ڈی جی آئی ایس پی آر کی جانب سے جاری ہونے والے بیان میں مزید کہا گیا ہے کہ مارے گئے دہشت گرد پنجگور کے علاقے پاروم اور اس کے گردونواح میں سیکورٹی چیک پوسٹوں پر حملوں کے ساتھ ساتھ سیکورٹی فورسز کے قافلوں پر آئی ای ڈی کے ذریعے حملوں میں بھی ملوث تھے۔

آئی ایس پی آر کے مطابق مارے گئے دہشت گردوں کے ٹھکانے سے بھاری مقدار میں اسلحہ اور گولہ بارود بھی برآمد ہوا ہے جسے دہشت گرد علاقے میں امن و امان کو خراب کرنے کے لیے استعمال کرنا چاہتے تھے۔

ترجمان پاک فوج کا کہنا ہے سیکورٹی فورسز بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے قوم کے ساتھ مل کر کام کرنے کے لیے پرعزم ہیں۔