فائیو اسٹار ہوٹل کی سہولیات سے مزین گرین لائن ٹرین کا افتتاح آج متوقع

عوام کے لئے خوش خبری ہے کہ گرین لائن ٹرین کا آج سے افتتاح ہورہا ہے جو اسلام آباد اور کراچی کے درمیان چلے گی۔ وزیر اعظم آج ٹرین کا افتتاح کریں گے۔ یہ ٹرین جدید سفری سہولیات سے آراستہ ہوگی۔

گرین لائن ٹرین جو سیلاب کے باعث بند ہوگئی تھی، آج سے دوبارہ چلنا شروع ہو جائے گی، اسے پاکستان ریلوے کی پریمیم ایکسپریس کے طور پر چلایا جائے گا۔

یہ بھی پڑھیے

ڈالر کی بے قابو اڑان:معاشی ماہرین اور صحافی وزیرخزانہ اسحاق ڈار پر پھٹ پڑے

امریکی ڈالر ریکارڈ 25 روپے اضافے سے تاریخ کی بلند ترین سطح پر پہنچ گیا

وفاقی وزیر خواجہ سعد رفیق کی ہدایت پر گرین لائن میں فائیو اسٹار ہوٹل کی طرف سے ناشتہ، لنچ ، ہائی ٹی اور ڈنر ٹکٹ کی قیمت ہی میں دیا جائے گا۔ اس کے علاوہ اعلیٰ معیار کی بیڈنگ، یوٹیلیٹی کٹ اور ہاؤس کیپنگ کا بھی انتظام کیا گیا ہے۔

ٹرین کا افتتاح وزیر اعظم شہباز شریف کریں گے۔ مارگلہ اسٹیشن سے کراچی تک چلنے والی گرین لائن راستے میں راولپنڈی، چکلالہ، لاہور، خانیوال، بہاولپور روہڑی، حیدرآباد اور ڈرگ روڈ پر رکے گی۔ اس ٹرین کو چین سے آنے والی نئی کوچز کے ساتھ چلایا جائے گا۔ گرین لائن کا ٹرن اراؤنڈ ٹائم 22 گھنٹے رکھا گیا ہے جو وقت کے ساتھ کم کیا جائے گا۔ ٹرین کو کامیاب بنانے اور سروس کوالٹی کو یقینی بنانے کیلیے چیف ایگزیکٹو افسر پاکستان ریلوے نے ایڈیشنل جنرل مینیجر ٹریفک کی سربراہی میں کمیٹی بھی تشکیل دے دی ہے۔ سی ای او ریلوے سلمان صادق شیخ کے مطابق گرین لائن پاکستان ریلوے میں ایک نئی جہت متعارف کروا رہی ہے اور اس طرز پر مستقبل میں مزید ٹرینیں بھی چلائی جائیں گی۔

گرین لائن کراچی سے رات دس بجے چلا کرے گی، اگلی دوپہر سوا دو بجے لاہور سٹاپ کرے گی اور رات سوا آٹھ مارگلہ پہنچے گی۔ اسی طرح مارگلہ سے کراچی جاتے وقت سفر کا آغاز سہ پہر تین بجے ہو گا، رات آٹھ بجے ٹرین لاہور رکے گی جبکہ اگلے روز دوپہر دو بج کر بیس منٹ پر کراچی پہنچے گی۔