جولائی میں ہدف سے15ارب روپے زائد ٹیکس جمع کیا،ایف بی آر

فیڈرل بورڈ آف ریونیو (ایف بی آر) کا کہنا ہے جولائی 2022 میں مقررہ ہدف سے 15 ارب روپے زائد کے ٹیکس جمع کیے گئے۔

ایف بی آر کی جانب سے جاری بیان میں بتایا گیا ہے کہ جولائی میں ٹیکس کا ہدف 443 ارب روپے تھا لیکن ادارے نے 15 ارب روپے زیادہ یعنی 458 ارب روپے کے ٹیکس اکٹھے کیے۔

یہ بھی پڑھیے

ای سی سی کا بڑا اقدام ، پی ایس او کے ڈیفالٹ کا خطرہ ٹل گیا

پیٹرول کی قیمت میں صرف 3 روپے کمی کیوں کی؟

ایف بی آر کے مطابق گزشتہ جولائی میں 417 ارب روپے کے محصولات جمع کیے گئے تھے، کھاتوں کی ایڈجسمنٹ کے بعد جولائی کے اعداد و شمار میں مزید بہتری متوقع ہے۔

اعلامیے میں بتایا گیا ہے کہ رواں سال جولائی میں ادا کیے گئے ریفنڈز کی رقم 28 ارب روپے تھی جبکہ گزشتہ سال جولائی میں 21 ارب روپے ریفنڈز کیے گئے تھے۔

ایف بی آر کا کہنا ہے کہ ٹیکس محصولات میں اضافہ فنانس ایکٹ 2022 میں متعارف کرائے گئے اقدامات کا نتیجہ ہے، محصولات میں مقامی ٹیکسوں کی شرح 55 فیصد جبکہ درآمدی ٹیکس کی شرح 45 فیصد رہی، مقامی ٹیکسوں میں بڑھوتری کی شرح تقریباَ 31 فیصد ہے۔

اعداد و شمار کے مطابق جائیدادوں کی فروخت پر پیشگی ٹیکس میں 118 فیصد اضافہ ہوا جبکہ تمباکو کی صنعت پر فیڈرل ایکسائز ڈیوٹی (ایف ای ڈی) میں ہونے والے اضافے کے ثمرات بھی آنا شروع ہوگئے ہیں۔ تمباکو کی صنعت سے ملنے والی فیڈرل ایکسائز ڈیوٹی میں 47 فیصد سے بھی زائد اضافہ ہوا ہے جو کہ 2.6ارب روپے ہے ۔ اور تمباکو کے شعبے سے سیلز ٹیکس کی مد میں ریکارڈ 67 فیصد اضافہ دیکھا گیا ہے۔ بین الاقوامی ہوائی سفر پر بڑھائی گئی فیڈرل ایکسائز ڈیوٹی کے سبب اس مد میں 200 فیصد اضافہ ہوا ہے ۔

اعلامیے کے مطابق کسٹم ڈیوٹی کی مد میں جولائی 2022 کے دوران 67 ارب روپے اکٹھے کیے گئے جبکہ انکم ٹیکس گوشواروں کی شرح 2020 میں 3.0 ملین تھی جو اب 3.4 ملین تک پہنچ گئی ہے۔