محکمہ ریلوے کا کئی ماہ سے معطل گرین لائن ٹرین بحال کرنیکا فیصلہ

محکمہ ریلوے نے کئی ماہ سے معطل گرین لائن ٹرین اگلے ماہ سے چلانے کا فیصلہ کرلیا۔ اے سی پارلر کی ہر سیٹ پر ایل سی ڈی کی تنصیب اور تمام مسافروں کو مفت کھانا بھی فراہم کیا جائے گا۔

ترجمان ریلوے کے مطابق وفاقی وزیر ریلوے خواجہ سعدرفیق کی زیرصدارت اجلاس میں راولپنڈی ، لاہور اور کراچی کے درمیان گرین لائن ٹرین چلانے کا اصولی فیصلہ کر لیا گیا۔جو کئی ماہ سے معطل ہے۔ٹرین میں بہترین انتظامات کی فراہمی پر بریفنگ دی گئی۔ اجلاس میں فیصلہ کیا گیا کہ گرین لائن ٹرین سپیرئیر سروس کےطور پر چلائی جائیگی۔ یہ ٹرین 2 اے سی پارلر، 5 اے سی بزنس، 6 اے سی سٹینڈرڈز ڈبوں پر مشتمل ہو گی۔ گرین لائن ٹرین میں 4 سے 5 اکانومی کلاس کوچز بھی شامل ہوں گی۔ وفاقی وزیر نے انتظامیہ کو گرین لائن کا لاہور تا کراچی سفری دورانیہ 20 گھنٹے سے کم کرنے کا ٹاسک دے دیا۔

یہ بھی پڑھیے

پاکستان معاشی مشکلات کا شکار: ترقی کی رفتار کم  اور روپیہ مزید کمزور ہوگا

پاکستان 2دسمبر کو ایک ارب ڈالر کے عالمی بانڈ کی ادائیگی کردیگا، گورنر اسٹیٹ بینک

اجلاس میں گرین لائن ٹرین میں بہترین سفری سہولیات فراہم کرنے کا فیصلہ کیا گیا۔ وفاقی وزیر کی ہدایت پر ٹکٹ کی قیمت میں مسافروں کو اعلیٰ معیار کا کھانا بھی دیا جائے گا۔ اس کے علاوہ اے سی پارلر کی ہر سیٹ پر علیحدہ ایل سی ڈی نصب کی جائے گی جس سے مسافر، بذریعہ ہیڈ فون اپنی پسندیدہ ویڈیوز سے محظوظ ہو سکیں گے۔

وفاقی وزیر ریلوے کو مغلپورہ ورکشاپ میں الیکٹرک آرک فرنس کی تنصیب کے کام کی رفتار پر بھی بریفنگ دی گئی۔وفاقی وزیر کو بتایا گیا کہ مغلپورہ ورکشاپ میں فرنس کی 75 فیصد فاؤنڈیشن مکمل کی جا چکی ہے اور 31 جنوری 2023 تک فرنس ٹیسٹنگ کے لیے تیار کر لی جائے گی۔ الیکٹرک آرک فرنس چلنے سے سٹیل شاپ کی پیداوار میں اضافہ اور کوالٹی میں بہتری آئے گی۔

تجاوزات کے بارے میں بریفنگ دیتے ہوئے ڈی ایس پشاور ناصر خلیلی نے بتایا کہ پشاور میں ٹرک اڈا، حیات آباد، کارخانو مارکیٹ اور دلازک روڈ کے اطراف میں تجاوزات کا صفایا کر دیا گیا ہے۔ دوران آپریشن 18 کنال اراضی سے تجاوزات ختم کی گئیں جبکہ واجبات کی عدم ادائیگی پر 135 دوکانیں بھی سر بمہر کی گئیں۔ وزیر ریلوے خواجہ سعد رفیق نے ڈی ایس پشاور اور ان کی ٹیم کو کامیاب آپریشن پر مبارکباد دی اور کہا کہ ہم آپ کے ساتھ کھڑے ہیں اور مل کر ریلوے کی ایک ایک انچ زمین ریکور کروائیں گے۔

ایک اور اجلاس میں خواجہ سعد رفیق نے ایم ایل ٹو پر متاثرہ ٹریک جلد مرمت کرنے کی ہدایت کی۔ انہوں نے فرید ایکسپریس اور پاکستان ایکسپریس کی بحالی کیلیے دو روز میں تجاویز پیش کرنے کی ڈائریکشن دیتے ہوئے کہا کہ شرح آمدن کو مدنظر رکھتے ہوئے، پسماندہ علاقوں میں ٹرینوں کو پہلے بحال کیا جائے۔ وزیر ریلوے نے ہر ایک ٹرین کے ریونیو اور کمپوزیشن بارے تفصیلی بریفنگ کیلیے اگلے ہفتے اجلاس طلب کر لیا ہے۔