پولٹری کا بحران ٹل گیا، ٹیکس محتسب کا سویابین سےلدے  9 بحری جہاز کلیئر کرنیکا حکم

ملک میں پولٹری کا سب سے بڑا بحران ٹل گیا، پولٹری ایسوسی اور امپورٹرز کی سن لی گئی، وفاقی ٹیکس محتسب آصف جاہ نے سویا بین  سے  لدے 9بحری جہازوں کی درآمد میں 2 روز سے حائل رکاوٹیں دور کردیں ۔  وفاقی ٹیکس محتسب نے سویابین درآمد کرنے کی اجازت دیدی۔ درآمد میں رکاوٹیں کھڑی کرنے والی وفاقی حکومت منہ تکتی رہ گئی۔

 تحریری حکم نامے میں کہا گیا ہے کہ درآمدی سویابین کی کلیئرنس فوری طور پر شروع کی جائے۔وفاقی محتسب نے ایک ہفتے کے اندر تمام کنسائمنٹ کلیئر کرنے کی ہدایت دیتے ہوئے فیصلے پر عمل درآمد کی نگرانی خود کرانے کا فیصلہ کیا ہے۔  وفاقی ٹیکس محتسب عوامی مفاد کی خاطر سویابین اور پولٹری فیڈ کی امپورٹ فوری کلیئرنس کی اجازت دیدی۔

یہ بھی پڑھیے

رواں مالی سال 23 ارب ڈالر کے قرض واپس کرنے ہیں، گورنر اسٹیٹ بینک

روشن ڈیجیٹل اکاؤنٹ میں سرمایہ کاری 2 سال کی کم ترین سطح پر پہنچ گئی

 تحریری حکمنامے میں قرار دیا کہ متعلقہ محکموں نے امپورٹ کلیئرنس روک کر قوانین کی خلاف ورزی کی ہے۔ایف ٹی او نے حکم دیا ہے کہ تمام متعلقہ اتھارٹیز کو اس ضمن میں فوری اقدامات شروع کرنا ہوں گے۔

فیصلے کے مطابق امپورٹ کلیئرنس روکنے سے کئی ملین ڈالر کا نقصان کیا گیا۔عوام کو پولٹری اور خوردنی تیل کی ضمن میں نہ صرف مہنگائی سے دوچار کیا گیا بلکہ فیڈ اور سویابین سپلائی روک کر ملک میں بحران پیدا کیا گیا جس سے انڈسٹری اور کاروبار کو ناقابل تلافی نقصان پہنچا۔

وفاقی ٹیکس محتسب کے مشیر سہیل الطاف ، ارسلان سبکتگین اور الماس جویندا نے مشترکہ نیوز کانفرنس میں اہم نوعیت کے فیصلے سے آگاہ کیا۔ الماس جوئیندا نے بتایا کہ  ایف ٹی او نےازخود کارروائی کرکے  ملک میں پولٹری کے بڑے بحران کوروک دیا ہے۔مشیر سہیل الطاف نے بتایا کہ ایف ٹی او نے فیصلے سے فوری انصاف فراہم کیا ہے۔

لیگل ایڈوائزر ارسلان سبکتگین نے بتایا کہ فیصلہ پاکستان بائیو سیفٹی رولز کے تحت دیا گیا ہے، پولٹری ایسوسی ایشن کی درخواست پر ایف ٹی او ڈاکٹر آصف محمود جاء نے سوموٹو ایکشن لیتے ہوئے سماعت کی۔ سماعت کے دوران ایف بی آر اور وزارت فوڈ سکیورٹی حکام کے اعتراضات کو مسترد کرتے ہوئے کراچی پورٹ پر رکے سویابین کے تمام جہاز کلئیر کرنے کا حکم دے دیا گیا۔