عائزہ خان علی ظفر کی مداح
عائزہ خان نے چپکے چپکے میں کام کرنے کی حامی اس لیے بھری کیونکہ ڈرامے کا ٹائٹل سانگ علی ظفر نے گایا ہے۔
پاکستان کی معروف اداکارہ عائزہ خان گلوکار علی ظفر کی مداح نکلیں۔ اداکارہ کا کہنا ہے کہ انہوں نے رمضان کے خصوصی ڈرامہ سیریل ’چپکے چپکے‘ میں کام کرنے کی حامی اسی لیے بھری تھی کیونکہ ڈرامے کا ٹائٹل سانگ علی ظفر نے گایا تھا۔
ماہ رمضان میں ہم ٹی وی پر نشر ہونے والے ڈرامہ سیریل ’چپکے چپکے‘ کو بےحد پذیزائی ملی ہے۔ ڈرامے میں عائزہ خان نے مینو کا کردار نبھایا اور بہترین اداکاری سے ایک مرتبہ پھر مداحوں کے دل جیت لیے ہیں۔ چپکے چپکے کے دیگر کرداروں اور ڈائیلاگز نے جہاں شائقین کو خوب ہنسایا وہیں علی ظفر کے گائے ہوئے ٹائٹل سانگ کو بھی بہت پسند کیا گیا۔ اداکارہ عائزہ خان نے بھی علی ظفر کے مداح ہونے کا اعتراف کرلیا ہے۔
View this post on Instagram
یہ بھی پڑھیے
چپکے چپکے نے تانا بانا کو مات دے دی
فوٹو شیئرنگ ایپ انسٹاگرام پر علی ظفر نے اپنی سریلی آواز میں گانا گنگناتے ہوئے ایک ویڈیو شیئر کی جس پر عائزہ خان نے علی ظفر مخاطب کرتے ہوئے کمنٹ میں بتایا کہ چپکے چپکے میں کام کرنے کی ایک بڑی وجہ یہ تھی کہ اس کا ٹائٹل سانگ آپ نے گایا تھا۔ جس پر علی ظفر نے ان کی تعریف کرتے ہوئے کہا کہ وہ ایک باصلاحیت اداکارہ ہیں۔
واضح رہے چپکے چپکے کو جہاں اس کے ٹائٹل سانگ نے چار چاند لگائے وہیں سوشل میڈیا اسٹار ارسلان نصیر اور ماضی کے معروف کرکٹر سلیم یوسف کی صاحبزادی ایمن سلیم کی جوڑی کو بھی خوب سراہا گیا ہے۔