سافٹ امیج کے فروغ کے لیے پبلک ڈپلومیسی کا استعمال

پاکستان کی ثقافت کو اجاگر کرنے پر کوک اسٹوڈیو کو خراج تحسین پیش کیا گیا۔

وزارت خارجہ نے پاکستان کی تاریخ، ثقافت اور سافٹ امیج کو دنیا کے سامنے لانے پر کوک اسٹوڈیو کی ٹیم کو خراج تحسین پیش کیا ہے۔ وزیر خارجہ شاہ محمود قریشی نے کہا ہے کہ پاکستان کے نظم و ضبط اور شعر و ادب کو دنیا کے سامنے لانے کے لیے پبلک ڈپلومیسی کا استعمال ایک بہترین عمل ہے۔

اسلام آباد میں وزارتِ خارجہ کی پبلک ڈپلومیسی ٹیم اور مشہور میوزک پروگرام کوک اسٹوڈیو کے اشتراک سے کلچرل ڈپلومیسی تقریب کا انعقاد کیا گیا۔ جس میں وزیر خارجہ شاہ محمود قریشی اور وزارت خارجہ کے افسران سمیت مختلف شعبہ زندگی سے تعلق رکھنے والے افراد نے شرکت کی۔

تقریب میں کوک اسٹوڈیو کے 13 سالہ سفر پر لکھی گئی کتاب بیونڈ دی ویو ٹرانسنڈنگ باؤنڈریز کی رونمائی بھی کی گئی۔ تقریب میں ثقافتی سفارتکاری سمیت کوک اسٹوڈیو کے کردار اور اس کے سماجی اثرات پر بحث کی گئی۔ مقررین کا کہنا تھا کہ کوک اسٹوڈیو نے پاکستان کی آواز کو دنیا تک پہنچانے میں اہم کردار ادا کیا ہے۔

یہ بھی پڑھیے

انڈیا میں 2 چوٹی کے میگزینز کی وزیراعظم نریندرہ مودی پر تنقید

وزیر خارجہ شاہ محمود قریشی نے تقریب سے خطاب کرتے ہوئے کہا کہ ہم پاکستان کا سافٹ امیج دنیا بھر کے سامنے لانے کیلئے پرعزم ہیں۔ انہوں نے کہا کہ نظم و ضبط، شعر و ادب اور تحمل و برداشت کو دنیا کے سامنے لانے کے لیے پبلک اور کلچرل ڈپلومیسی کا استعمال ایک مثبت اقدام ہے۔

تقریب سے خطاب کرتے ہوئے کوکا کولا کے جنرل مینجر فہد اشرف نے کہا کہ کوک اسٹوڈیو کا مقصد دنیا بھر میں پاکستان کی ثقافت اور تاریخ کو اجاگرکرنا ہے۔ کوک اسٹوڈیو کے ذریعے نئی صلاحیتوں کو فروغ دیا جارہا ہے۔ تقریب کے اختتام پر قوال فرید ایاز اور ابو محمد کی جانب سے قوالی بھی پیش کی گئی جسے خوب سراہا گیا۔

حکومت کی جانب سے ملک کے سافٹ امیج کو دنیا کے سامنے لانے کے لیے میوزک انڈسٹری کا استعمال ایک بہترین ذریعہ ہوسکتا ہے، جس سے ہم اپنی ثقافت، تاریخ اور نظم و ضبط کو دنیا کے سامنے پیش کرسکتے ہیں۔

Facebook Comments Box