لکس اسٹائل ایوارڈز ؛نامزدگیوں پر نوشین شاہ سونیا حسین کی حمایت میں آگئیں

پاکستانی اداکارہ سونیا حسین لکس اسٹائل ایوارڈز 2021 کی نامزدگیوں سے مطمئن نہیں لگتیں کیونکہ ان کے ڈرامہ سیریل سراب کو کسی بھی زمرے میں نامزد نہیں کیا گیا۔

لکس اسٹائل ایوارڈز کے 20ویں ایڈیشن کے لیے ٹیلی ویژن ، میوزک اور فیشن کی کیٹیگریز میں نامزدگیوں کا  اعلان  کردیا گیا۔ ووٹنگ بھی شروع  ہوگئی۔ اگرچہ اس مرتبہ بہت سارے نئے فنکار ایوارڈز کے  لیے نامزد ہوئے لیکن سونیا حسین نے سراب کو ایک بھی نامزدگی نہ ملنے پر برہمی کا اظہار کیا۔  اداکارہ  نے انسٹاگرام پوسٹ میں انٹرٹینمنٹ  انڈسٹری  میں  دوہرے معیار  پر  سوال  اٹھایا۔

سونیا حسین کے مطابق سراب جیسے پروجیکٹ نے معنی خیز مواد کے بارے میں بات کی ہے. یہ  ڈرامہ عوام کو حقیقی مسائل سے آگاہ کرنے کے لیے بنایا گیا تھا، اداکارہ  نے  کہا  کہ  بدقسمتی سے اس طرح کے اسکرپٹس کو زیادہ اہمیت نہیں دی جاتی۔ سونیا  حسین  نے  اپنے  پرانے  ڈراموں  کے  نام  گنوائے  جنہیں  ماضی  میں  کبھی نامزد  نہیں  کیا  گیا۔  انہوں  نے  کہا  کہ   میری گڑیا، عشق زہ نصیب  اور ایسی ہے تنہائی  جیسے  ڈرامے  سماجی  مسا ئل  پر  روشنی  ڈالتے  ہیں  لیکن  انہیں  کبھی  اہمیت  نہیں  دی  گئی۔  اداکارہ  نے  سوال  اٹھایا  کہ  کیا  ان  میں  سے  کوئی  ایک  ڈرامہ  بھی  کسی  ایک  نامزدگی  کا  مستحق  نہیں  تھا؟

یہ  بھی  پڑھیے

ہمایوں سعید اور کبریٰ  خان ناقدین کے نشانے پر

سونیا  حسین  نے  لکس  ایوارڈز  کی  انتظامیہ  کو  تنقید  کا  نشانہ  بناتے  ہوئے کہا  کہ  جس  ملک  میں  فنکاروں  کی  موت  کے  بعد  انہیں  ایوارڈ  دیئے  جاتے  ہوں  وہاں  وہ  سوال  کرنے  والی  کون  ہوتی  ہیں؟

اداکارہ  نوشین  شاہ  نے  سونیا  حسین  کی  حمایت  میں  ٹوئٹ  کردیا۔  اداکارہ  نے  اپنے  پیغام  میں  سونیا  حسین  کو  مخاطب  کرتے  ہوئے  لکھا  کہ آپ  کے  مداح  ہی  آپ  کا  ایوارڈ  ہیں۔

یہ  پہلا  موقع  نہیں  کہ  کسی  فنکار  نے لکس ایوارڈز  کی  نامزدگیوں  پر سوال  اٹھایا  ہو۔  اس  سے  پہلے  بھی  متعدد  اداکار لکس اسٹائل  ایوارڈز  کے  معیار  پر  تنقید  کرچکے  ہیں۔