مستحق طلباء کی فیسوں کا معاملہ: نمل یونیورسٹی اور پاکستان بیت المال میں معاہدہ طے پاگیا

اسلام آباد: پاکستان بیت المال نے نیشنل یونیورسٹی آف ماڈرن لینگویجز (نمل) کے مستحق طالب علموں کو تعلیمی وظائف کی فراہمی کے لیے مفاہمتی یادداشت پر دستخط کردیئے۔

اس سلسلے میں منعقدہ ایک تقریب منیجنگ ڈائریکٹر پاکستان بیت المال عامر فدا پراچہ نے ڈائریکٹر جنرل نمل یونیورسٹی ، بریگیڈئیر سیّد نادرعلی کے ہمراہ مفاہمتی یادداشت پر دستخط کیے۔

یہ بھی پڑھیے

آصف زرداری پر سازش کے الزام کا کیس: شیخ رشید پر 2 مارچ کو فردجرم عائد ہوگی

کراچی پولیس آفس پر حملہ،3 دہشتگرد ہلاک، پولیس، رینجرز اہلکاروں سمیت 4افراد شہید

اس مفاہمتی یادداشت کے مطابق پاکستان بیت المال ہر سال نمل یونیورسٹی میں زیر تعلیم 250 مستحق طالب علموں کو تعلیم جاری رکھنے کے لیے فیس کی ادائیگی کرے گا، ان میں انڈر گریجویٹ اور پوسٹ گریجویٹ طالب علم بھی شامل ہیں۔

اس موقع پر خطاب کرتے ہوئے ایم۔ڈی پاکستان بیت المال عامر فدا پراچہ نے کہا کہ ملک کے غریب اور مستحق طالب علموں کی بیت المال تک رسائی ممکن بنا دی گئی ہے۔

انہوں نے کہا کہ ملک بھر کے نادار اور محروم طبقات کی بحالی کے لیے پاکستان بیت المال لازوال خدمات سرانجام دے رہا ہے، غریب طالب علموں کو تعلیمی وظائف کی فراہمی سے ان کے تعلیمی سفر میں حائل مالی مشکلات کو ختم کردیا گیا ہے تاکہ مستقبل میں یہ نوجوان کامیابیاں سمیٹتے ہوئے روشن اور خوشحال پاکستان کی بنیاد رکھیں۔

ڈائریکٹر جنرل نمل یونیورسٹی بریگیڈئیر سیّد نادر علی نے یونیورسٹی میں زیرِ تعلیم مستحق طالب علموں کی مدد پر ایم۔ڈی پاکستان بیت المال کا شکریہ ادا کرتے ہوئے اس امید کا اظہار کیا کہ دونوں اداروں کے باہمی تعاون سے بہت سے نوجوان اپنی تعلیم کو مکمل کرنے کے قابل ہوجائیں گے۔