انڈیا کے میجر جنرل ایک پاکستانی سے بےوقوف بن گئے

انڈین کے ریٹائرڈ میجر جنرل ایک عام پاکستانی سوشل میڈیا صارف کو فواد چوہدری سمجھ کر گفتگو کرتے رہے اور جعلی اکاؤنٹ پہچان نہ سکے۔

انڈیا کے ریٹائرڈ میجر جنرل ہرش ککڑ کو وفاقی وزیر برائے سائنس و ٹیکنالوجی فواد چوہدری پر طنز کرنا مہنگا پڑگیا۔ ہرش ککڑ نے فواد چوہدری کے جعلی اکاؤنٹ سے کی جانے والی گفتگو ٹوئٹر پر شیئر کی تو خود ہی مذاق بن گئے۔

انفارمیشن ٹیکنالوجی میں اس قدر ترقی کرنے کے باجود بھی انڈین فوج اصل اور جعلی اکاؤنٹ کے درمیان فرق نہیں سمجھ سکتی۔ انڈیا کے میجر جنرل ہرش ککڑ نے سماجی رابطوں کی ویب سائٹ ٹوئٹر پر دعویٰ کیا کہ انہوں نے فواد چوہدری کو بےوقوف بنادیا ہے۔

معاملہ یہ تھا کہ کسی پاکستانی سوشل میڈیا صارف نے فواد چوہدری بن کر ہرش ککڑ سے گفتگو کی۔ جعلی اکاؤنٹ سے کی جانے والی چیٹ میں صارف نے ہرش ککڑ کو ٹیکنالوجی سے متعلق آگاہ کرتے ہوئے بےوقوف بنایا۔

ہرش ککڑ نے چیٹ کا اسکرین شاٹ ٹوئٹر پر شیئر کرتے ہوئے فواد چوہدری کو ٹیگ کیا اور ان کا مذاق اڑانے کی کوشش کی۔ تبصرے میں لکھا کہ ‘کیا فواد چوہدری واقعی عقل نہیں رکھتے۔’ دیکھا جائے تو یہ بات خود ہرش ککڑ پر صادق آتی ہے کیونکہ وہی جعلی اکاؤنٹ کو پہچان نہیں سکے تھے۔

یہ بھی پڑھیے

فواد چوہدری کی کسانوں پر بنائے گئے گانے کی تشہیر

فواد چوہدری نے پوسٹ کا جواب دیتے ہوئے لکھا کہ ‘حیرانی ہوئی کہ ہرش ککڑ جیسا احمق شخص بھارتی فوج میں میجر جنرل کے عہدے تک کیسے پہنچ گیا؟’

وفاقی وزیر نے ہرش ککڑ کو سوشل میڈیا استعمال کرنے کی بنیادی تربیت لینے کا مشورہ دیا۔ فواد چوہدری نے طنزیہ انداز اپناتے ہوئے پاکستان کے نوجوانوں سے درخواست کی کہ وہ انڈین جنرلز کو جھوٹی خبروں کو پرکھنے سے متعلق بنیادی کورسز کرائیں۔

متعلقہ تحاریر