دوسرے ٹی ٹوئنٹی میں شکست پر قومی ٹیم تنقید کی زد میں
سابق کرکٹرز کے مطابق پاکستان کا ٹاس جیت کر پہلے بیٹنگ نہ کرنے کا فیصلہ غلط تھا۔
دوسرے ٹی ٹوئنٹی میچ میں انگلینڈ کی ہاتھوں شکست کے بعد قومی کرکٹ ٹیم کی انتظامیہ اور کپتان بابر اعظم کو تنقید کا نشانہ بنایا جارہا ہے۔ سابق کرکٹرز کا کہنا ہے کہ پاکستان کا ٹاس جیت کر پہلے بیٹنگ نہ کرنے کا فیصلہ غلط تھا۔
گزشتہ روز کھیلے گئے دوسرے ٹی ٹوئنٹی میچ میں انگلینڈ نے پاکستان کو 45 رنز سے شکست دے کر سیریز ایک ایک سے برابر کردی۔ سیریز کا تیسرا اور فیصلہ کن میچ 20 جولائی کو مانچسٹر میں کھیلا جائے گا۔ دوسرے ٹی ٹوئنٹی میچ میں پاکستان کی خراب کارکردگی اور ٹیم مینجمنٹ کے غلط فیصلوں کے باعث گرین شرٹس تنقید کی زد میں ہیں۔
سابق فاسٹ بالر شعیب اختر نے سماجی رابطوں کی ویب سائٹ ٹوئٹر پر پیغام میں کہا کہ قومی ٹیم کی جانب سے ٹاس جیتنے کے باوجود پہلے بالنگ کا فیصلہ غلط تھا، شاندار بیٹنگ پچ پر پہلے فیلڈنگ کرنا سمجھ سے بالاتر ہے۔
Such a poor decision by captain & the management by bowling 1st on a great batting pitch it’s beyond me just speechless 🤬🤬🤬 pic.twitter.com/Iiv3xEBkTr
— Shoaib Akhtar (@shoaib100mph) July 18, 2021
یہ بھی پڑھیے
ٹی ٹوئنٹی کرکٹ ورلڈ کپ انڈیا سے عمان منتقل
پاکستان کرکٹ ٹیم کے سابق کپتان وسیم اکرم نے محمد حفیظ کی موجودگی پر بھی سوالات اٹھائے۔ ٹوئٹ میں لکھا کہ محمد حفیظ کی جگہ پر بائیں ہاتھ کے کسی کھلاڑی کو موقع دینا چاہیئے تھا۔
Two leg spinners are bowling left handed batsman would have been ideal instead of Hafiz. What do you guys think ?
— Wasim Akram (@wasimakramlive) July 18, 2021
سابق کرکٹرز نے ٹی ٹوئنٹی اسکواڈ میں معین خان کے بیٹے اعظم خان کی شمولیت پر سوالات اٹھائے جبکہ اسپورٹس تجزیہ نگاروں کے مطابق ایک کھلاڑی جب کوئی اچھی کارکردگی کا مظاہرہ نہیں کر پارہا تو انتظامیہ اور کپتان اسے ٹیم کا حصہ کیسے بنا سکتے ہیں۔ مخالف ٹیم کی طرف سے بڑا اسکور کرنے پر ٹیم دباؤ میں آجاتی ہے اور یہی ان کے لیے نقصان دہ ثابت ہوتا ہے۔ اسپورٹس تجزیہ کار عالیہ رشید کا کہنا ہے کہ تیسرے اور آخری ٹی ٹوئنٹی میچ میں بابراعظم اور ٹیم مینجمنٹ کو اچھے فیصلے لینے ہوں گے۔
Pakistan bowling first after winning the toss. I think Pakistan should hv batted first. Aap kia kehtay hain?
— Aalia Rasheed (@aaliaaaliya) July 18, 2021
واضح رہے کہ انگلش ٹیم کے 200 رنز کے ہدف کے تعاقب میں پاکستانی ٹیم 9 وکٹس کے نقصان پر 155 رنز ہی بنا سکی تھی۔ شاندار کارکردگی پر انگلش کرکٹر معین علی کو مین آف دی میچ کا ایوارڈ دیا گیا۔ اس سے قبل پہلے ٹی ٹوئنٹی میچ میں پاکستان نے انگلینڈ کو 31 رنز سے شکست دی تھی۔
