پاکستان میں اینیمیشن کی صنعتی ترقی و فروغ کے لیے اہم اقدام
عالمی منڈی میں اینیمیٹڈ انڈسٹری کا حجم 270 ارب ڈالرز ہے اور توقع کی جارہی ہے کہ 2025 تک یہ 415 ارب ڈالرز ہوجائے گا۔
پاکستان کی وزارت انفارمیشن ٹیکنالوجی اور پاکستانی فوج کے شعبہ تعلقات عامہ (آئی ایس پی آر) کے درمیان اینیمیشن (حرکت پذیری) کی صنعت کی ترقی اور فروغ کے لیے مل کر کام کرنے پر اتفاق ہوگیا ہے۔
اتوار کو آئی ایس پی آر ہیڈکوارٹرز میں ایک تقریب منعقد ہوئی جس میں وفاقی وزیر برائے انفارمیشن ٹیکنالوجی اینڈ ٹیلی کام سید امین الحق، سیکرٹری شعیب احمد صدیقی اور ڈی جی آئی ایس پی آر میجر جنرل بابر افتخار شریک ہوئے۔
آئی ایس پی آر کے مطابق اس وقت عالمی منڈی میں اینیمیشن انڈسٹری (حرکت پذیری کی صنعت) کا حجم 270 بلین ڈالرز ہے تاہم توقع کی جارہی ہے کہ 2025 تک یہ 415 بلین ڈالرز ہوجائے گا۔
پاکستان میں اینیمیٹڈ انڈسٹری کا حصہ بننے کی زیادہ صلاحیت موجود ہے اور یہ پاکستان کی معیشت کے لیے بہتر کردار ادا کر سکتی ہے جس سے روز گار کے مواقع بھی پیدا ہوسکتے ہیں۔ اس کا فروغ غیرملکی سرمایہ کاری کا بھی ذریعہ بن سکتا ہے۔
یہ بھی پڑھیے
ویڈیو گیمنگ اور اینیمیشن کے شوقین افراد کے لیے خوشخبری
پاک فوج کے شعبہ تعلقات عامہ کے مطابق یہ صنعت فنونِ لطیفہ کے شعبے میں بھرپور حصہ ڈال رہی ہے تاہم تعلیم، صحت کی دیکھ بھال اور دفاع کے شعبوں، ٹیکنالوجی اور اینیمیشن کے فروغ کے لیے باہمی تعاون کی کوشش کی جائے گی۔
اینیمیشن کے شعبے میں ممکنہ کاروباری افراد کو فعال کرنے کے لیے بنائے گئے منصوبے میں ایک مخصوص انکیوبیشن سینٹر کی بھی تجویز دی گئی ہے۔ معیاری انسانی وسائل کی تربیت کے لیے مخصوص شعبوں میں اینیمیٹڈ گیمنگ اور ڈیزائننگ سے متعلق مختصر کورسز متعارف کرائے جائیں گے۔
دسمبر 2020 میں وفاقی وزیر سائنس و ٹیکنالوجی فواد چوہدری نے اپنے ٹوئٹ میں بتایا تھا کہ ویڈیو گیمنگ اور اینیمیشن انڈسٹری کی ترقی کے لیے نوجوانوں کو 3 ماہ میں گیمز سرٹیفکیشن پروگرام شروع کریں گے۔
Very happy to speak with leading players of Pakistan’s video gaming and animation industry. The first batch of one thousand youngsters’ training will be launched in three months’ time Inshallah pic.twitter.com/5pCLEsIkPi
— Ch Fawad Hussain (@fawadchaudhry) December 2, 2020
وفاقی وزیرسائنس اینڈ ٹیکنالوجی فواد چوہدری نے پاکستان کے ویڈیو گیمنگ اینڈ اینیمیشن انڈسٹری کے بہترین کھلاڑیوں سے گفتگو کی تھی جس کے بعد انہوں نے ٹوئٹ میں خوشی کا اظہار کرتے ہوئے کہا تھا کہ ‘1000 نوجوانوں کے بیج کے لیے ٹریننگ کا آغاز اگلے 3 ماہ میں ہوجائے گا۔’
