شہزاد رائے آبادی اور خاندانی منصوبہ بندی کے لیے اعزازی سفیر مقرر
عہدے کا نوٹیفکیشن وفاقی وزارت برائے خدمات صحت ،ضوابط و رابطہ کی جانب سے جاری کر دیاگیا
پاکستان کےمعروف گلو کار اور سماجی کارکن شہزاد رائے کو تعلیم اور تحفظ اطفال سمیت سماج کے مختلف شعبوں میں نمایاں خدمات انجام دینے کے باعث اعزازی سفیر بنادیا گیا ہے۔
” صدر مملکت کی سربراہی میں فیڈرل ٹاسک فورس برائے آبادی کے حوالے سے منعقدہ پانچویں اجلاس کے دوران ، معروف گلوکار اور سماجی کارکن شہزاد رائے کو آبادی اور خاندانی منصوبہ بندی کے لیے اعزازی برانڈ ایمبیسیڈر نامزد کیا گیا ہے جس کا نوٹیفکیشن وفاقی وزارت برائے خدمات صحت ،ضوابط و رابطہ کی جانب سے جاری کر دیا ہے۔
یہ بھی پڑھیے
آرمی چیف کی شہزاد رائے کی تعلیم کے لیے کاوشوں کی تعریف
شہزاد رائے کو بچوں کے بینڈ کی تلاش
حکومتی سطح پر اہم ذمہ داری سونپی جانے کےبعد شہزاد رائے نے سماجی رابطوں کی ویڈیوز اور فوٹوز شیئرنگ ایپ انسٹا گرام پر اپنی تعیناتی کا اعلان کرتے ہوئے ایک ویڈیو شیئر کی جس میں انھوں نے خیبرپختونخوا کی تحصیل تنگی میں ایک ایسے شخص سے ملاقات کی جس کے 19 بچے تھے ، شہزاد رائے کی جانب سے سوال کیا گیا کہ آپ کے 19بچے ہیں کیا آپ ان کی صحت اور تعلیم کا خیال رکھ سکتے ہیں ، جس پر 19 بچوں کے باپ بہرام خان کا کہنا تھا کہ اس کے تمام بچوں میں سے کوئی بھی اسکول نہیں جاتا جس کی وجہ اس نے بتائی کی اس کی آمدنی اتنی نہیں ہے کہ وہ اسکول کے اخراجات اٹھا سکے ۔
شہزاد رائے نے اپنی ویڈیو کے ساتھ کیپشن میں لکھا کہ آبادی اور خاندانی منصوبہ بندی کے سفیر کے طور پر نامزد ہونا ایک اعزاز اور بھاری ذمہ داری ہے۔
View this post on Instagram
واضح رہے کہ گلوکار شہزادرائے کی زیر انتظام زندگی ٹرسٹ ملک میں تعلیم کے شعبے میں غیر معمولی خدمات انجام دے رہی ہے اس ٹرسٹ کے باعث 10 ہزار سے زائد وہ بچے جو معیاری تعلیم حاصل کرنے کے قابل نہیں تھے ان کو بین الاقوامی سطح کی تعلیم دی جارہی ہے ، شہزاد رائے کی زندگی ٹرسٹ کو بین الاقوامی سطح پر بہترین اور شفاف کام کرنے والی تنظیم قرار دیا جاچکا ہے ۔
شہزادرائے نے 2018 میں ، آسٹریا کے شہر ویانا میں اقوام متحدہ کے دفتر برائے منشیات اور جرائم (UNODC) کے 61 ویں اجلاس میں پاکستان کی نمائندگی کی اور اسی سال ان کی خدمات پر انہیں ستارۂ امتیاز سے بھی نوازا گیا۔ 2005 کے زبردست زلزلے کے بعد ان کی بحالی کے کاموں پر انہیں پہلا ستارہ امتیاز سے نوازا گیا۔
