پنجاب کی 79 تحصیلوں میں مرحلہ وار ریسکیو 1122 کا آغاز کردیا گیا

وزیراعلیٰ پنجاب سردار عثمان بزدار کی قیادت میں ریسکیو 1122 سروس نے ایک اور سنگ میل عبور کرلیا۔ وزیراعلیٰ عثمان بزدار نے پنجاب کی 79 تحصیلوں میں ریسکیو 1122 سروس کا مرحلہ وار باضابطہ آغاز کردیا۔

پہلے مرحلے میں 11 تحصیلوں میں عوام کو ایمرجنسی سروس کی بروقت فراہمی کیلئے 22 نئی ایمبولینسز متعلقہ حکام کے حوالے کرنے کی آج تقریب وزیراعلیٰ آفس میں منعقد ہوئی۔ وزیراعلیٰ عثمان بزدار نے ایمبولینسز کی چابیاں ایمرجنسی آفیسرز کو دیں۔

یہ بھی پڑھیے

لوہاری گیٹ بم دھماکے کی ابتدائی رپورٹ وزیراعلیٰ کو پیش

جنوبی پنجاب صوبے کیلیے اپوزیشن کیساتھ بیٹھنے کو تیار ہیں، شاہ محمود قریشی

وزیراعلیٰ عثمان بزدار نے نئی ایمبولینسز کا معائنہ کیا۔ وزیراعلیٰ عثمان بزدار نے نئی ایمبولینسز میں ریسکیو کے لئے جدید سہولتوں کا مشاہدہ کیا۔

اس موقع پر خطاب کرتے ہوئے وزیراعلیٰ عثمان بزدار نے کہا کہ پہلے مرحلے میں شرقپور شریف، صفدرآباد، نارنگ منڈی، نوشہرہ ورکاں، نورپور، قائد آباد، کہروڑ پکا، رینالہ خورد، پنڈی بھٹیاں، دریا خان اور جلال پور پیر والا کی تحصیلوں میں ریسکیو 1122 کا آغاز کیا ہے۔ ہر تحصیل میں ایک ریسکیو سٹیشن، 2 ایمبولینسز اور 29 افراد پر مشتمل ایمرجنسی سٹاف مہیا کیا جا رہا ہے-

ان کا کہنا تھا کہ پہلے مرحلے میں 11 تحصیلوں میں عوام کو ایمرجنسی سروس کی بروقت فراہمی کیلئے 22 نئی ایمبولینسز فراہم کردی ہیں- ہماری حکومت نے ریسکیو سروس کا دائرہ کار تحصیل کی سطح تک وسیع کیا ہے- پنجاب کی 79 تحصیلوں اور ٹاؤنز میں نئے ریسکیو اسٹیشنز بنائے گئے ہیں۔

انہوں نے کہا کہ ان تحصیلوں میں جون تک ایمرجنسی سروس کا آغاز کر دیا جائے گا- انہوں نے کہا کہ ایمرجنسی سروسز کو مزید منظم کرنے کیلئے امدادی کارکنان کے لئے سروس اسٹرکچر مرتب کیا ہے- اب امدادی کارکنان (ریسکیورز) ترقی کے مواقع حاصل کرسکیں گے-

وزیراعلیٰ عثمان بزدار کا کہنا تھا کہ پنجاب پاکستان کا پہلا صوبہ ہوگا جہاں ہنگامی صورتحال کے لئے ریسکیو ائیر ایمبولینس سروس شروع کی جا رہی ہے۔ ریسکیو ائیر ایمبولینس کے آغاز سے ریسکیو سروسز کو نئی شناخت ملے گی۔ ریسکیو ائیر ایمبولینس سروس سے دور دراز علاقوں تک ریسکیو کا دائرہ کار وسیع ہو گا- ریسکیو ائیر ایمبولینس سروس کا اجراء وقت کا تقاضہ ہے۔انہوں نے کہا کہ ہر انسانی جان قیمتی ہے اور بروقت علاج معالجہ ہر فرد کا حق ہے-

عثمان بزدار کا کہنا تھا کہ ریسکیو 1122سروس میں اصلاحات متعارف کرانے پر ڈائریکٹر جنرل ڈاکٹر رضوان نصیر اور ان کی ٹیم کو مبارکباد پیش کرتا ہو ں۔ صوبائی وزراء راجہ بشارت،میاں خالد محمود،ایم این ایز ثناء اللہ مستی خیل،شوکت بھٹی،ترجمان پنجاب حکومت حسان خاور،سیکرٹری اطلاعات،ڈی جی ریسکیو1122اورمتعلقہ حکام نے تقریب میں شرکت کی۔