سربراہ پاک بحریہ کی عراق میں اپنے ہم منصب اور وزیر دفاع سے ملاقاتیں

ایڈمرل امجد خان نیازی عراق کے سرکاری دورے پر ہیں، نیول ہیڈکوارٹرز آمد پر گارڈ آف آنر پیش کیا گیا، نیول اکیڈمیز کا دورہ بھی کیا۔

چیف آف دی نیول اسٹاف ایڈمرل امجد خان نیازی عراق کے سرکاری دورے پر ہیں۔ دورے کے دوران نیول چیف نے کمانڈر عراقی بحریہ ایڈمرل احمد جاسم معارج اور وزیر دفاع جمعہ عناد سعدون خطّاب سے ملاقات کی۔

نیول ہیڈکوارٹرز بصرہ آمد پر سربراہ پاک بحریہ کا استقبال کمانڈر عراقی نیوی ایڈمرل احمد جاسم معارج نے کیا اور انہیں گارڈ آف آنر پیش کیا گیا۔

یہ بھی پڑھیے

بلوچستان: سیلاب سے متاثرہ علاقوں میں پاک فضائیہ کی امدادی کارروائیاں جاری

پاک فضائیہ میں چینی ساختہ جے10 طیاروں کا اسکواڈرن شامل

عراقی بحریہ کے کمانڈر سے ملاقات میں علاقائی میری ٹائم سیکیورٹی اور باہمی دلچسپی کے پیشہ ورانہ امور بشمول دو طرفہ بحری تعاون پر تبادلہ خیال کیا گیا۔

نیول چیف امجد نیازی نے خطے میں میری ٹائم سیکیورٹی کو یقینی بنانے کے لیے پاک بحریہ کی کوششوں پر روشنی ڈالی جس میں ریجنل میری ٹائم سیکیورٹی پٹرولز اور کمبائنڈ میری ٹائم فورسز (CMF) میں شرکت شامل ہے۔

سربراہ پاک بحریہ نے نیول بیس اُم قصیر اور عراقی نیول اکیڈمی کا بھی دورہ کیا جہاں انہیں بریفنگ دی گئی۔

بعد ازاں وزیر دفاع جمعہ عناد سعدون خطّاب سے ملاقات کے دوران باہمی دلچسپی کے پیشہ ورانہ امور بشمول دو طرفہ دفاعی تعاون پر تبادلہ خیال کیا گیا۔

نیول چیف نے مشقوں اور تربیتی تبادلے کے پروگرامز کے ذریعے دونوں ممالک کی مسلح افواج کے درمیان رابطوں کو بڑھانے کی اہمیت پر زور دیا۔

عراق کے وزیر دفاع نے متنوع شعبوں میں مضبوط دو طرفہ فوجی تعاون کی اہمیت کو تسلیم کرتے ہوئے عسکری شعبوں میں تعاون بڑھانے پر زور دیا۔

نیول چیف کے دورہ عراق سے دونوں ممالک کے درمیان بالعموم اور بحری افواج کے درمیان بالخصوص دفاعی تعلقات کو فروغ حاصل ہوگا۔

متعلقہ تحاریر