ایم کیو ایم اور پی پی کے درمیان سندھ کی تقسیم کا معاہدہ صوبے سے دشمنی ہے، فنکشنل لیگ

پاکستان مسلم لیگ فنکشنل سندھ کے رہنماؤں نے کہا ہے کہ ایم کیو ایم  اور پیپلز پارٹی (پی پی پی ) نے سندھ کی تقسیم کا معاہدہ کرکے ایک مرتبہ پھر  سندھ دشمنی کا ثبوت دیا ہے –

پاکستان مسلم لیگ فنکشنل سندھ کے جنرل سکریٹری سردار عبدالر حیم انفارمیشن سیکریٹری سندھ اور ایم پی اے نصرت سحر عباسی ایم پی اے نند کمار گوکلانی ڈاکٹر رفیق بانبھن علی غلام نظامانی نے مشترکہ جاری کردہ پریس بیان میں کہا ہے کہ ایم کیو ایم  اور پیپلز پارٹی نے سندھ کی تقسیم کا معاہدہ کرکے ایک مرتبہ پھر  سندھ دشمنی کا ثبوت دیا ہے۔

یہ بھی پڑھیے

اوورسیز پاکستانی عمران خان کی حمایت میں سڑکوں پر آگئے

وزیراعلیٰ پنجاب ولد وزیر اعظم ،ملک میں موروثی سیاست کا بول بالا

انہوں نے کہا ہے کہ پیر صاحب پگارا کی قیادت میں پہلے بھی سندھ کے عوام نے بٹوارے کی کوششوں کو  یکسر مسترد کیا تھا اور اب بھی مسترد کرتے ہیں۔

انہوں نے کہا ہے کہ ایم کیو ایم اور پیپلز پارٹی اپنی اپنی ڈوبتی کشتیوں کو سازشوں کے ذریعے بچانے کی ناکام کوشش کررہی ہیں ، ایسے ناپاک عزائم اور منصوبے نہ صرف سندھ کو کمزور کریں گے بلکہ پاکستان کو نا تلافی نقصان پہنچانے کا سبب بھی  بن سکتے ہیں-

انہوں نے مزید کہا ہے کہ سندھی اور اردو بولنے والے اور دیگر سندھ کے باسیوں نے تفرقہ اور بٹوارہ کی سیاست کو رد کر دیا ہے۔ سندھ کا بٹوارہ کبھی اور کسی صورت برداشت نہیں کریں گے۔

فنکشنل لیگ کے رہنماؤں کا مزید کہنا تھا کہ سندھ کی عوام شہید سورھیہ بادشاہ کے فلسفے وطن یا کفن ، آزادی یا موت پر عمل پیرا ہیں لحاظہ ان سندھ دشمنوں کا خواب کبھی پورا نہیں ہوگا ، سندھ کے وسائل کو لوٹنے والی پیپلز پارٹی اور ایم کیو ایم  کی سندھ دشمنی واضع ہوچکی ہے۔

ان کا کہنا تھا کہ وقت آگیا ہے کہ اب سندھ کے عوام  ان دونوں سندھ دشمن جماعتوں کا سوشل بائیکاٹ کریں اور  آئندہ  انتخابات میں ان جماعتوں کو ووٹ نہ دیکر انکے سندھ دشمن ارادوں اور پالیسیوں  کو دفن کر دیں۔