عمران خان ملک میں عدم استحکام کی آگ بھڑکانا چاہتا ہے، وزیراعظم شہباز شریف

اسلام آباد: پاکستان مسلم لیگ (ن) کے صدر اور وزیراعظم شہباز شریف نے کہا ہے کہ عمران خان ایک بزدل آدمی ہے جو عدالتوں کو تلاشی نہیں دینا چاہتا کیونکہ وہ ملزم ہے۔

وزیراعظم شہباز شریف کا عمران خان کا عدالتوں سے غیر حاضری اور مختلف مقدمات میں تلاشی نہ دینے پر ایک سخت  بیان سامنے آیا ہے۔

شہباز شریف کی جانب سے جاری ہونے والے بیان میں کہا گیا ہے کہ عمران خان اپنے ہی آئی ایم ایف پروگرام کی بحالی ناکام بنانے کی کوشش کررہا ہے اور سڑکوں پر افراتفری اور فتنہ وفساد اسی ایجنڈے کا حصہ ہے۔

یہ بھی پڑھیے

مریم نواز کا فصل آباد جلسہ: حکومت اور اپوزیشن کا اظہار یکجہتی کا بےمثال مظاہرہ

مریم نواز نے ثاقب نثار کے بعد توپوں کا رخ آصف سعید کھوسہ کی جانب موڑ دیا

وزیراعظم نے کہا ہے بزدل شخص عدالت کو تلاشی نہیں دیتا کیونکہ مجرم ہے ، یہ شخص چاہتا ہے کہ ملک میں عدم استحکام کی آگ بھڑکے مگر یہ نہیں چاہتا کہ غریب عوام کو مہنگائی، معاشی دباﺅ سے نجات ملے اور پاکستان کے لئے وسائل کی راہ ہموار ہو۔

وزیراعظم شہباز شریف نے کہا ہےکہ عمران خان کا عدالتوں سے بھاگنا بزدلی کی انتہاء ہے کیونکہ اس یوٹرن خان پہلے آئی ایم ایف پروگرام سے بھاگ گیا ، اب عدالتوں سے بھاگ رہا ہے۔

ان کا کہنا تھا کہ پہلے یہ شخص اپنے وعدوں اور نظریات سے بھاگ گیا تھا ، اب عدالتوں سے بھاگ رہا ہے۔

وزیراعظم نے کہا کہ نواز شریف اور مسلم لیگ ن کی قیادت نے نیب نیازی گٹھ جوڑ کے بدترین انتقام کا سامنا کیا ہے اور ہم اپنے بیٹوں، بیٹیوں اور بہنوں سمیت جھوٹے مقدمات میں عدالتوں اور قانون کے آگے پیش ہوئے اور پیش ہوتے رہیں گے۔

وزیراعظم نے مزید کہا کہ مسلم لیگ (ن) کے راہنماء سزائے موت کی چکیوں میں رہے، ہیروئن جیسے جھوٹے مقدمات کا سامنا کیا۔