پنجاب اور کےپی کے انتخابات: وفاقی کابینہ کی 21 ارب روپے کی سمری پارلیمنٹ کو بھیجنے کی منظوری

وزیراعظم محمد شہباز شریف کی زیرِ صدارت وفاقی کابینہ کا اجلاس آج وزیراعظم ہاؤس اسلام آباد میں منعقد ہوا۔

وفاقی کابینہ کے اجلاس میں سوات کے علاقے کبل میں کاؤنٹر ٹیررازم  ڈیپارٹمنٹ پولیس اسٹیشن میں ہوئے واقعہ کے نتیجے میں  قیمتی جانی نقصان پر گہرے دکھ اور رنج کا اظہار کیا گیا اور شہداء کے لیے فاتحہ خوانی اور حادثے میں زخمی ہونے والے افراد کی جلد صحت یابی کے لیے دعا کی گئی۔

وزیراعظم نے وفاقی وزارت داخلہ کو کبل سوات کے سی ٹی ڈی اسٹیشن میں ہونے واقعہ کی تحقیقات میں وفاقی حکومت کا نمائندہ شامل کرنے کی ہدایت کی۔

یہ بھی پڑھیے 

مافیا پھر سرگرم: ایک ماہ کے دوران چینی کی قیمت میں 25 سے 30 روپے فی کلو اضافہ

شہباز حکومت کا عوام کو عید کے فوری بعد تحفہ ، گیس میٹر چارجز 500 روپے فکس

وزیراعظم نے مزید ہدایت کی کہ پشاور پولیس لائن دھماکے میں شہید ہونے والوں کو جو پیکج دیا گیا اسی طرز پر شہداء پیکج کبل واقعہ میں شہید ہونے والوں کی بھی دیا جائے۔

وفاقی کابینہ نے پنجاب اور خیبر پختونخوا کے عام انتخابات کے حوالے سے الیکشن کمیشن آف پاکستان کو 21 ارب روپے کی فراہمی کے حوالے سے وزارت خزانہ کی سمری کو پارلیمنٹ کو ریفر کرنے کی منظوری دے دی۔

وفاقی کابینہ نے سرمایہ کاری بورڈ کی سفارش پر انویسٹ پاکستان  (Invest Pakistan ) کے لیے قانون سازی کرنے کی منظوری دے دی۔ اس قانون سازی کے ذریعے سرمایہ کاری بورڈ کے تحت ”انویسٹ پاکستان“ کا دفتر قائم کیا جائے گا جو کہ پبلک پرائیویٹ پارٹنر شپ میں کام کرے گا۔ مذکورہ قانون سازی سرمایہ کار دوست سروسز کی فراہمی کو یقینی بنانے میں مدد دے گی۔

وفاقی کابینہ کے آج کے اجلاس میں کابینہ کے 08-11-2017  کے  فیصلے جس میں تمام وزارتوں اور ڈویژنز کو اس بات کا پابند کیا تھا کہ وہ اپنے ایکٹ اور رولز میں لفظ ”وفاقی حکومت“ کی جگہ "Appropriate Authorities” کا استعمال کرنے کے لیے ترامیم کریں، کے حوالے سے گائیڈ لائنز کی منظوری دی گئی۔

وفاقی کابینہ نے وزارت بحری امور کی سفارش پر اِن لینڈ ریوینو سروس کے گریڈ 21 کے افسر سیدین رضا زیدی کو ڈیپوٹیشن کی بنیاد پر کراچی پورٹ ٹرسٹ کا چیئرمین تعینات کرنے کی منظوری دے دی۔

وفاقی کابینہ نے اقتصادی رابطہ کمیٹی کے 13 اپریل 2023 کو منعقد ہونے والے اجلاس میں کیے گئے فیصلوں کی توثیق کردی۔ ان فیصلوں میں جنوبی وزیرستان کے انگور اڈا کسٹم اسٹیشن کو افغانستان اور وسطی ایشیائی ریاستوں کے لیے ایکسپورٹ لینڈ روٹ (Export Land Route) ڈیکلئیر کرنے کی منظوری شامل ہے۔

مزید برآں انہی فیصلوں میں ماحول دوست الیکٹرک بائیکس اور الیکٹرک رکشاز کا استعمال عام کرنے کے لئے فنانسنگ فسیلیٹی کی منظوری بھی شامل ہے جس کے تحت 5 لاکھ روپے کا قرضہ پرائم منسٹر یوتھ بزنس اینڈ ایگرکلچر لون اسکیم کے ذریعے صفر فیصد مارک اَپ پر دستیاب ہوگا۔ اس اقدام سے ملک کو مہنگے ایندھن کے درآمد کی مد میں خاطر خواہ بچت ہو گی۔