پنجاب میں کرونا ایس او پیز کی کھلے عام خلاف ورزیاں

سوشل میڈیا پر ایک ویڈیو گردش کر رہی ہے جس میں عوام کی بڑی تعداد ایک شاپنگ مال میں جمع ہے اور بالکل بھی سماجی فاصلہ اختیار نہیں کیا گیا ہے۔

پاکستان میں کرونا کی وباء ایک بار پھر سر اٹھا رہی ہے اور دن بہ دن اموات اور کیسز کی تعداد میں اضافہ ہورہا ہے۔ اس صورتحال میں بھی صوبہ پنجاب میں کرونا کی وباء کے ایس او پیز کی کھلے عام خلاف ورزیاں کی جارہی ہیں۔

پاکستان بھر میں کرونا کی وباء کے پھیلاؤ میں اضافہ ہورہا ہے اور اس صورتحال میں صوبہ پنجاب ایس او پیز کی خلاف ورزیوں میں سب سے آگے ہے۔ صوبہ پنجاب کے دارالحکومت لاہور میں کرونا سے بچاؤ کی احتیاطی تدابیر یا ایس او پیز کی خلاف ورزی پر ایک ہی دن میں 50 سے زیادہ مقدمات بھی درج کیے گئے ہیں۔ جبکہ آج ہی صوبے میں وباء کے باعث 2 بچے انتقال کر گئے ہیں۔

اس جان لیوا صورتحال میں بھی پنجاب کے عوام غیرسنجیدگی کا مظاہرہ کر رہے ہیں۔ سوشل میڈیا پر ایک ویڈیو گردش کر رہی ہے جس میں عوام کی بڑی تعداد ایک دوسرے شاپنگ مال میں جمع ہے اور بالکل بھی سماجی فاصلہ اختیار نہیں کیا گیا ہے۔ یہ ویڈیو صوبہ پنجاب کے شہر سیالکوٹ میں واقع امتیاز سپر اسٹور کی ہے۔

ویڈیو دیکھ کر ایسا لگتا ہے کہ جیسے کوئی ہنگامہ آرائی ہورہی ہو لیکن ایسا بالکل نہیں ہے۔ ایک دوسرے کو دھکے دینے والے یہ تمام افراد گاہک ہیں جو سماجی فاصلے سمیت دیگر ایس او پیز پر بھی عملدرآمد نہیں کر رہے ہیں۔ ایک طرف لوگوں پر ایس او پیز پر عمل نہ کرنے کی وجہ سے مقدمات درج کیے جارہے ہیں تو دوسری جانب امتیاز سپر اسٹور کی انتظامیہ نے بڑی تعداد میں عوام کو جمع کر کے قانون کی خلاف ورزی کی ہے۔

یہ بھی پڑھیے

کرونا کی وبا کے باعث پاکستان میں سیاحت کا شعبہ متاثر

اس کے علاوہ سوشل میڈیا پر پنجاب کی ایک اور تصویر گردش کر رہی ہے جس میں دیکھا جاسکتا ہے کہ ایک ملبوساتی برانڈ کی لانچنگ سے پہلے اسٹور کے باہر عوام بڑی تعداد میں جمع ہیں۔ یہاں بھی کسی قسم کی احتیاطی تدابیر یا ایس او پیز پر عملدرآمد نہیں کیا جارہا ہے۔

کسی بھی برانڈ کی کتنی ہی زیادہ رعایتی فروخت چل رہی ہو لیکن اس وبائی صورتحال میں عوام پر بھی ذمہ داری عائد ہوتی ہے کہ احتیاطی تدابیر پر عمل کریں۔ ادھر سوشل میڈیا صارفین سوال کر رہے ہیں کہ انفرادی طور پر لوگوں کے خلاف مقدمات درج کیے جارہے ہیں لیکن کیا ان سپر اسٹورز کے مالکان یا انتظامیہ کے خلاف کارروائی کی جائے گی؟

متعلقہ تحاریر