کراچی کا سرکاری اسکول جہاں داخلے کے لیے قطار لگتی ہے

پاکستان کے مشہور گلوکار شہزاد رائے کی فلاحی تنظیم ’زندگی ٹرسٹ‘ کے زیراہتمام چلنے والا کراچی کا ایک ایسا سرکاری اسکول بھی ہے جس کے باہر داخلہ فارم کے حصول کی خاطر بچوں کے والدین نے لمبی قطار لگائی ہے۔

پاکستان کے مشہور گلوکار شہزاد رائے کو فلاحی کاموں کی وجہ سے بھی جانا جاتا ہے جو معیاری تعلیم کے فروغ کے لیے کافی عرصے سے سرگرم ہیں۔ سماجی رابطوں کی ویب سائٹ ٹوئٹر پر شہزاد رائے نے ایک ویڈیو جاری کی ہے جس میں دیکھا جاسکتا ہے کہ ایک اسکول کے باہر والدین کی لمبی قطار لگی ہوئی ہے جو اپنے بچوں کے داخلے کے لیے فارمز لینے کا انتظار کر رہے ہیں۔ دراصل یہ اسکول پاکستان کے سب سے بڑے شہر کراچی میں واقع ہے جو شہزاد رائے کی فلاحی تنظیم ’زندگی ٹرسٹ‘ کے زیراہتمام چلایا جاتا ہے۔

شہزاد رائے نے ویڈیو کے ساتھ لکھا کہ ’ایس ایم بی فاطمہ جناح گورنمنٹ اسکول کے باہر والدین داخلہ فارم کے لیے قطار میں لگے ہوئے ہیں تاکہ ان کے بچے مفت اور معیاری تعلیم حاصل کرسکیں۔‘

Parents queuing for admissions forms outside SMB Fatima Jinnah Govt School adopted by @ZindagiTrust so their kids can get free and quality education. Unfortunately we can’t accommodate so many children every year due to limited space.I wish more govt schools can be turned around pic.twitter.com/P6dKsssujD

— Shehzad Roy (@ShehzadRoy) March 31, 2021

شہزاد رائے نے لکھا کہ ’بدقسمتی سے ہم ہر سال محدود جگہ کی وجہ سے اتنے بچوں کو داخلہ نہیں دے سکتے ہیں۔‘ انہوں نے اس امید کا اظہار کیا کہ کاش کہ مذید سرکاری اسکولوں کا نظام بھی بہتر کیا جاسکے۔

یہ بھی پڑھیے

شہزاد رائے نے فلاحی کاموں سے کچھ دن کا وقفہ لے لیا

پاکستان میں سرکاری اسکولوں کی خستہ حال عمارتوں میں دی جانے والی تعلیم کا کوئی معیار نہیں ہے۔ ملک میں معیاری تعلیم کے لیے لوگ نجی اسکولوں کو فوقیت دیتے ہیں لیکن شہریوں کی بڑی تعداد اِن نجی اسکولوں کی فیس ادا کرنے کی حیثیت نہیں رکھتی ہے۔ ایسے میں شہزاد رائے نے اپنی فلاحی تنظیم کے سائے میں ایک سرکاری اسکول کی مفت تعلیم کا معیار اتنا بلند کردیا ہے کہ اسکول کے باہر لمبی قطارتک لگ گئی ہے۔

ٹوئٹر پر ویڈیو شیئر ہونے کے بعد کئی مشہور شخصیات نے شہزاد رائے کو مبارکباد دی ہے۔

Really proud of you @ShehzadRoy hoping to visit this one soon ♥️ https://t.co/vmx9yRMxG8

— Fahad Mustafa (@fahadmustafa26) March 31, 2021

معروف اداکار اور میزبان فہد مصطفیٰ نے شہزاد رائے پر فخر کرتے ہوئے کہا کہ وہ جلد ہی اس اسکول کا دورہ کریں گے۔