افسر شاہی بمقابلہ سیاست دان کوئی نئی بات نہیں
افسر شاہی اور سیاستدانوں کے درمیان کھینچا تانی برصغیر کے تقریباً تمام ممالک کا مشترکہ المیہ ہے۔
پاکستان میں افسر شاہی اور سیاست دانوں کے درمیان کھینچا تانی کوئی نئی بات نہیں ہے۔ اتوار کے روز وزیراعلیٰ پنجاب کی معاون خصوصی برائے اطلاعات و نشریات ڈاکٹر فردوس عاشق اعوان نے اسسٹنٹ کمشنر (اے سی) سیالکوٹ سونیا صدف کو رمضان بازار میں گلے سڑے پھلوں کی فروخت پر خریداروں اور دکانداروں کے سامنے جھاڑ پلادی۔
سیالکوٹ میں سستے رمضان بازاروں میں ناقص اشیاء کی فروخت پر ڈاکٹر فردوس عاشق اعوان نے اسسٹنٹ کمشنر سیالکوٹ سونیا صدف کو مخاطب کرتے ہوئے کہا کہ ’کس بے غیرت نے آپ کو اسسٹنٹ کمشنر لگا دیا؟ آپ کی حرکتیں ہی اسسٹنٹ کمشنر والی نہیں ہیں۔ افسر شاہی کی کارستانیاں حکومت بھگت رہی ہے۔‘
یہ بھی پڑھیے
این اے 249 کے معاملے پر صحافیوں کے ذاتی نوعیت کے حملے
دکانوں پر گلے سڑے پھل ديکھ کر فردوس عاشق اعوان برہم ہوگئیں اور انہوں نے اسسٹنٹ کمشنر سونیا صدف کو بلا کر ڈانٹ دیا۔ اسسٹنٹ کمشنر سونيا صدف نے جواب ديا کہ ’ميڈم آرام سے بھی بات کی جا سکتی ہے۔‘ جس پر فردوس عاشق اعوان مزيد آگ بگولہ ہوگئيں اور جواب دیا کہ کيا آپ آسمان سے اتری ہيں؟
ڈاکٹر فردوس عاشق اعوان اور اسسٹنٹ کمشنر سونیا صدف کے درمیان سخت جملوں کے تبادلے کے بعد اسسٹنٹ کمشنر سونیا صدف رمضان بازار سے روانہ ہوگئیں۔
رمضان بازار کے باہر بھی میڈیا سے گفتگو کرتے ہوئے فردوس عاشق اعوان نے کہا کہ ’وزيراعلیٰ پنجاب سے اسسٹنٹ کمشنر کی شکايت کروں گی۔ ڈپٹی کشمنر کو بھی ديکھنا چاہيے کہ بازاروں میں سب اچھا کی رپورٹ دينے والے سچ بول رہے ہیں یا جھوٹ۔‘
ادھر پاکستان مسلم لیگ (ن) کی نائب صدر مریم نواز نے اس واقعے پر فردوس عاشق اعوان سے معافی کا مطالبہ کیا ہے۔
سول سرونٹس اور بیوروکریٹس پڑھ لکھ کر، محنت کر کے، مقابلے کے امتحان پاس کر کے اس مقام تک پہنچتے ہیں، SELECT ہو کر نہیں آتے۔ وزیر ہونے کا مطلب یہ نہیں ہے کہ آپ کو افسران کی تذلیل کا لائسنس مل گیا ہے۔ یہ رعونت قابل قبول نہیں۔ سونیا صدف سے معافی مانگیے
— Maryam Nawaz Sharif (@MaryamNSharif) May 2, 2021
وزیراعظم عمران خان کے معاونِ خصوصی برائے سیاسی روابط شہباز گل نے مریم نواز کے ٹوئٹ کے جواب میں ایک تصویر شیئر کی ہے۔ تصویر کے ایک حصے میں ایک خاتون پولیس اہلکار مریم نواز کے سامنے سے کوئی چیز ہٹا رہی ہیں جبکہ اُسی تصویر کے دوسرے حصے میں ایک پولیس افسر مسلم لیگ (ن) کے صدر شہباز شریف کے سامنے ایک باادب ملازم کی طرح کھڑے ہیں۔
سرکاری افسران آپکے زاتی ملازم نہیں: مریم نواز ٹویٹ pic.twitter.com/t3fxUlRli1
— Dr. Shahbaz GiLL (@SHABAZGIL) May 2, 2021
اس تصویر کے ساتھ شہباز گل نے مریم نواز کو مخاطب کرتے ہوئے لکھا ہے کہ سرکاری افسران آپ کے ملازم نہیں ہیں۔
محسن سولنگی نامی ٹوئٹر صارف نے مسلم لیگ (ن) کے رہنما رانا ثناءاللہ کی ایک ویڈیو شیئر کی ہے جس میں وہ چیف سیکریٹری پنجاب کو دھمکی دے رہے ہیں۔
Couple of days ago Rana sanaullah threatened chief secretary Punjab did bureaucrats give same response then?#افسر_شاہی_عوام_کو_جوابدہ pic.twitter.com/ef2aNGWZaz
— Mohsin Solangi (@SehwaniMohsin) May 2, 2021
بعد ازاں چيف سيكریٹری پنجاب جواد رفيق ملک نے سيالكوٹ میں پیش آنے والے واقعے کی مذمت کی ہے۔ انہوں نے کہا ہے کہ ’اسسٹنٹ كمشنر سونيا صدف اور ديگر انتظامی افسران سخت گرمی اور كرونا کی وباء كے باوجود فرنٹ لائن پر موجود ہيں۔‘
جواد رفیق ملک نے کہا ہے کہ ’پنجاب بھر میں انتظامی افسران دن رات عوام کی سہولت کے لیے میدان عمل میں موجود ہیں جو قابل ستائش ہے۔ کسی سرکاری افسرکی تذلیل کرنا زیب نہیں دیتا۔ فیلڈ میں موجود تمام افسران کی انتھک محنت اور جرات کو سلام پیش کرتے ہیں۔‘
افسر شاہی اور سیاست دانوں کے درمیان کھینچا تانی صرف پاکستان کا ہی نہیں بلکہ برصغیر کے تقریباً تمام تمام ممالک کا مشترکہ المیہ ہے۔ انڈین دارالحکومت نئی دہلی کے وزیر اعلیٰ اروند کیجری وال کی ویڈیو بھی سوشل میڈیا پر وائرل ہو رہی ہے جس میں وہ کام میں کوتاہی برتنے پر ایک افسر پر برہمی کا اظہار کررہے ہیں۔
@Dr_FirdousPTI فردوس آپا نےصرف لفظ بے غیرت کہہ کر کام خراب کردیا ورنہ بطور عوامی لیڈر ٹیکسوں سے بھاری تنخواہیں لینے والے افسران سے کام لینا اور انھیں کھینچ کر رکھنا منتخب نمائندوں کا فرض ہے ۔۔ دیکھئےخراب کارکردگی پر دہلی کے سی ایم کس طرح اپنی ٹیم سے باز پرس کرتے ہیں pic.twitter.com/hf5HgboRRE
— Ahsan Sabz (@ahsansap7) May 2, 2021
یہ ایک تلخ حقیقت ہے کہ پاکستان میں ہمیشہ سے افسر شاہی اور سیاست دان اپنے مفادات کو ترجیح دیتے آئے ہیں۔ پاکستانی عوام کی بدقسمتی ہے کہ ان پر ہمیشہ افسر شاہی، برآمد شدہ معاشی ماہرین، صنعت کاروں اور جاگیرداروں نے حکومت کی ہے۔
