ایک اور پاکستانی نے ایشیا کا سب سے بڑا ایوارڈ حاصل کرلیا

پاکستان میں کام کرنے والی فلاحی تنظیم اخوت فاؤنڈیشن کے بانی ڈاکٹر امجد ثاقب کو ایشیا کے سب سے بڑے اعزاز رامون مگسیسے ایوارڈ سے نوازا گیا ہے۔ ڈاکٹر امجد ثاقب یہ ایوارڈ حاصل کرنے والے 10 ویں پاکستانی بن گئے ہیں۔ وزیراعظم عمران خان نے انہیں مبارک باد دی ہے۔

ڈاکٹر امجد ثاقب نے 2001ع میں اپنے دوستوں کے ساتھ مل کر اخوت فاؤنڈیشن کی بنیاد رکھی تھی۔ اس تنظیم کا بنیادی مقصد لوگوں کو بلاسود قرض فراہم کرنا ہے تاکہ وہ معاشی طور پر مضبوط ہوسکیں۔

اخوت فاؤنڈیشن لوگوں کو گھر بنانے میں مدد فراہم کرنے کے علاوہ بچوں کی شادی، تعلیم اور دیگر اخراجات کے لیے بھی بغیر کسی سود کے رقم فراہم کرتی ہے۔ اخوت فاؤنڈیشن وزیراعظم ہاؤسنگ اسکیم کے تحت لوگوں کو اپنا گھر بنانے میں بھی سہولتیں دے رہی ہے۔

میڈیا رپورٹس کے مطابق ڈاکٹر امجد ثاقب کو پاکستان میں غربت کے خاتمے اور مستحق افراد کو مالی طور پر خود مختار بنانے میں کلیدی کردار ادا کرنے پر رامون مگسیسے ایوارڈ دیا گیا ہے۔

سماجی رابطوں کی ویب سائٹ ٹوئٹر پر وزیراعظم عمران خان نے ڈاکٹر امجد ثاقب کو مبارکباد پیش کرتے ہوئے لکھا کہ ریاست مدینہ کے ماڈل پر فلاحی ریاست کے قیام کے سفر میں انہیں ڈاکٹر امجد ثاقت کی کامیابی پر فخر ہے۔

Have been told this year’s Ramon Magsaysay Award, Asia’s highest honour, has been given to a Pakistani, Dr. Amjad Saqib, Founder Akhuwat. Congratulations to him. We are proud of his achievement as we move forward in creating a welfare state based on Riasat e Madina Model.

— Imran Khan (@ImranKhanPTI) August 31, 2021

ڈاکٹر امجد ثاقب نے وزیراعظم عمران خان کا شکریہ ادا کرتے ہوئے لکھا کہ ریاست مدینہ فلاح و بہبود اور انسانی وقار کا حتمی نمونہ ہے۔ کامیاب پاکستان پروگرام اس مقصد تک پہنچنے کے لیے ایک بہترین حکمت عملی ہے۔

JazakAllah @ImranKhanPTI We are indebted to you PM. Riasat e Madina is the ultimate model of welfare and human dignity. Kamyab Pakistan Program is the best strategy to reach this objective. Thanks for leading the nation towards this goal @shaukat_tarin https://t.co/D895WDIljD

— Dr Amjad Saqib (@DrAmjadsaqib1) August 31, 2021

یہ بھی پڑھیے

شہید ڈاکٹرز کو سول ایوارڈز نہ دینا بدقسمتی ہے، ڈاکٹر قیصر سجاد

اخوت فاؤنڈیشن کے بانی ڈاکٹر امجد ثاقب سے قبل 9 پاکستانی شخصیات اور ادارے رامون مگسیسے ایوارڈ حاصل کرچکے  ہیں۔  1963 میں اختر حمید خان، 1986میں عبدالستار ایدھی اور بلقیس ایدھی، 1992 میں شعیب سلطان خان، 1995 میں عاصمہ جہانگیر، 1998 میں ڈاکٹر ادیب الحسن رضوی،  1999 میں تسنیم احمد صدیقی، 2002 میں ڈاکٹر رتھ فاؤ، 2004 میں ابن عبدالرحمان اور 2014 میں دی سٹیزن فاؤنڈیشن کو اس ایوراڈ سے نوازا گیا تھا۔

اس وقت اخوت فاؤنڈیشن کے ملک بھر میں 826 دفاتر ہیں جس میں 7 ہزار سے زائد ملازمین کام کررہے ہیں۔