کیا سویلین اور فوجی قیادت نے بیچ کا راستہ نکال لیا؟

وفاقی وزیر اطلاعات و نشریات فواد چوہدری نے کہا ہے کہ وزیراعظم عمران خان اور آرمی چیف جنرل قمر جاوید باجوہ کے درمیان نئے ڈی جی آئی ایس آئی کی تقرری کے لیے مشاورت کا عمل مکمل ہوچکا ہے۔

سماجی رابطوں کی ویب سائٹ ٹوئٹر پر پیغام شیئر کرتے ہوئے وفاقی وزیر فواد چوہدری نے لکھا ہے کہ ” وزیر اعظم اور آرمی چیف کے درمیان نئے DG ISI کی تقرری پر مشاورت کا عمل مکمل ہو چکا ہے اور نئی تقرری کا پراسس شروع ہو چکا ہے، ایک بار پھر سول اور فوجی قیادت نے یہ ثابت کیا ہے کہ ملک کے استحکام، سالمیت اور ترقی کیلئے تمام ادارے متحد اور یکساں ہیں۔

وزیر اعظم اور آرمی چیف کے درمیان نئے DG ISI کی تقرری پر مشاورت کا عمل مکمل ہو چکا ہے اور نئ تقرری کا پراسس شروع ہو چکا ہے، ایک بار پھر سول اور فوجی قیادت نے یہ ثابت کیا ہے کہ ملک کے استحکام، سالمیت اور ترقی کیلئے تمام ادارے متحد اور یکساں ہیں

— Ch Fawad Hussain (@fawadchaudhry) October 13, 2021

یہ بھی پڑھیے

حکومت بچانے کے لیے مودی کالا قانون استعمال کرنے لگا

گزرا 12 اکتوبر بہت سوں کی امیدوں پر پانی پھیر گیا

واضح رہے کہ گزشتہ پریس کانفرنس کرتے ہوئے وفاقی وزیر فواد چوہدری نے کہا تھا کہ "نئے ڈی جی آئی ایس آئی کی تعیناتی وزیراعظم کا صوبدیدی اختیار ہے، اور اس کے لیے قانونی طریقہ اختیار کیا جائے گا۔

وزیراعظم اور آرمی چیف کے درمیان ہونے والی ملاقات کے حوالے سے گفتگو کرتے ہوئے فواد چوہدری کا کہنا تھا کہ "گزشتہ روز وزیراعظم عمران خان اور آرمی چیف قمر جاوید باجوہ کے درمیان طویل مشاورتی ملاقات ہوئی۔ ملاقات انتہائی خوشگوار ماحول میں ہوئی تھی۔ دونوں اطراف سے کوئی ایسا بیان نہیں دیا گیا جس سے ملک اور فوج کے وقار میں کمی ہو۔

آئی ایس پی آر کے 6 اکتوبر کو جاری ہونے والے بیان کے مطابق لیفٹیننٹ جنرل ندیم انجم کو لیفٹیننٹ جنرل فیض حمید کی جگہ ڈی جی انٹر سروسز انٹیلی جنس (آئی ایس آئی) جبکہ فیض حمید پشاور کور کمانڈر کی حیثیت سے کمان سنبھالیں گے۔

وزیراعظم عمران خان نے 8 اکتوبر کو قومی سلامتی کمیٹی (این ایس سی) کا اجلاس طلب کیا جس میں لیفٹیننٹ جنرل فیض حمید نے بطور ڈی جی آئی ایس آئی بھی شرکت کی تھی۔

یہ بات سامنے آئی تھی کہ وزیر اعظم افغانستان کے موجودہ حالات کی وجہ سے جنرل فیض حمید کو ڈی جی کے طور پر رکھنا چاہتے تھے۔

حکومت اور فوج کے درمیان اس مسئلے پر اختلافات واضح تھے تاہم عمران خان نے کل اپنی کابینہ کو ڈی جی آئی ایس آئی کی تعیناتی کے حوالے سے اعتماد میں لیا تھا۔

تاہم وفاقی وزیر فواد چوہدری کے ٹوئٹ سے ایسا لگتا ہے کہ "چیف آف آرمی اسٹاف اور وزیراعظم عمران خان نے نئے ڈی جی آئی ایس آئی کی تقرری کے حوالے سے کوئی درمیانی راستہ تلاش کرلیا ہے۔”