ٹی 20 ورلڈ کپ 2021: پاک بھارت میچ میں چند گھنٹے باقی، جوش عروج پر
شاہینو جھپٹنا اور جھپٹنا اور پلٹنا تو جیت لے کر پلٹنا۔ شائقین کرکٹ قومی ٹیم سے جیت کی امیدیں باندھ لیں۔
آئی سی سی ٹی ٹوئنٹی (20) ورلڈ کپ 2021 کے سب سے بڑے میں روایتی حریف پاکستان اور بھارت کی ٹیمیں ٹکرائیں گی۔ دبئی کا میدان سج گیا میچ پاکستانی وقت کے مطابق 7 بجے شروع ہوگا۔ گیندوں کی بوچھاڑ ہو گی اور بلے بازوں کے وار ہوں گے۔
کشمیر سے گوادر تک پاک بھارت میچ کے چرچے جاری ہیں ۔ لاہور ، کراچی ، اسلام آباد ، پشاور اور دیگر بڑےشہروں میں جذبہ عروج ہے ۔ کئی شہریوں نے منچلوں نے میچ دیکھنے کے لیے بڑی اسکرینز کا انتظام کرلیا ۔ چند گھنٹوں کا انتظار ہے پھر ہو گا میچ دھواں دھار انداز میں۔
یہ بھی پڑھیے
بھارت کے بعد پاکستان کرکٹ ٹیم کا ٹکراؤ کس کس سے ہوگا؟
ٹی ٹوئنٹی ورلڈکپ سپر12مرحلہ: انگلینڈ نے ویسٹ انڈیو کو چاروں شانے چت کردیا
ایک طرف پاکستانی شاہین تو دوسری جانب بھارتی سورما اتریں گے میدان میں۔ آئی سی سی ٹی ٹوئنٹی ورلڈ کپ 2021 کے سب سے بڑے مقابلے پر کروڑوں لوگوں کی نظریں ٹکی ہوئی ہیں۔
پاکستانی شائقین کرکٹ نے باؤلنگ میں شاہین آفریدی ، حسن علی اور شاداب سے امیدیں لگا لیں جبکہ بیٹنگ میں بابر اعظم ، فخر ، پروفیسر حفیظ اور شعیب ملک پر نظریں جما لیں۔
فین شاہینوں کی جیت کے لیے پُرامید۔ شائقین کا کہنا ہے کہ یہ میچ نہیں جنگ ہے جنگ جو ہارے گا انڈیا۔
کپتان بابر اعظم کا کہنا ہے کہ ہمیں صرف ورلڈ کپ جیتنا ہے ہنسو ، کھیلو ، انجوائے کرو ۔ اپنے سوچ کو مثبت رکھیں گے۔ ان کا کہنا تھا ہم اپنے آپ کو بالکل سادہ رکھیں گے ، تیاری مکمل ہے تمام کھلاڑیوں پر بھروسہ ہے ۔ ریکارڈ ہمیشہ ٹوٹنے کے لیے بنتے ہیں۔
بھارتی کپتان ویرات کوہلی کا کہنا ہے کہ پاکستانی کھلاڑی کبھی بھی گیم پلٹ سکتے ہیں۔ پاکستانی ٹیم ہمیشہ سے ایک مضبوط ٹیم رہی ہے ۔ ان کے خلاف ہمیشہ آپ کو اپنی بیسٹ کرکٹ کھیلنا پڑتی ہے۔ کیونکہ ان کے پاس بہت ٹیلنٹ ہے اور ایسی پلیئر ہیں جس گیم کو کسی بھی وقت تبدیل کرسکتے ہیں۔
سابق قومی ٹیم کے کپتان شاہد خان آفریدی کا کہنا ہے کہ بھارت کے خلاف ہمیشہ میچ پریشر پر کھیلا جاتا ہے جس کے پاس تگڑا دل ہے اور جو تگڑے دل کے ساتھ کھیلے گا وہی جیتے گا اس لیے پاکستانی ٹیم کو تگڑے دل کے ساتھ کھیلنا چاہیے تاکہ جیت ان کا مقدر بن سکے ۔ جس ٹیم نے پریشر کو ہینڈل کرلیا اور کم سے کم غلطیاں کیں وہ ٹیم جیتے گی۔
قومی ٹیم کے حق میں دعا کرتے ہوئے وزیرا عظم عمران خان نے کہا ہے کہ ان شاء اللہ بھارت کے خلاف پاکستانی ٹیم کو فتح حاصل ہو گی۔
وفاقی وزیر فواد چوہدری کہتے ہیں پلیئرز کے پاس سپر اسٹار بننے کا موقع ہے ۔ پاکستان کا ہر شہری ٹیم کی فتح کے لیے پرجوش ہے۔ ان شاءاللہ جیت جنون جذبے اور پاکستان کی ہوگی۔
سابق مایہ ناز بلے باز محمد یوسف کا کہنا ہے کہ پاکستانی ٹیم کو پوری قوت سے بھارتی سورماؤں پر جھپٹا ہو گا متحدہ عرب امارات کا ماحول پاکستان کے لیے سازگار ہے۔
