سیلاب متاثرین کی امداد کیلئے پاک فضائیہ کے 25 ہیلی کاپٹرز اور 8 طیارے میدان میں

سیلاب سے متاثرہ علاقوں میں امدادی مہم تیز کرنے کے لئے پاک فضائیہ کے 25 سے زائد ہیلی کاپٹرز اور 08 سی۔130 طیارے بھی امدادی کارروائیوں میں شامل ہوگئے۔ ترجمان پاک فضائیہ کے مطابق مذکورہ ہیلی کاپٹر اور سی-130 طیارے ناقابل رسائی علاقوں تک اشیائے ضروریہ پہنچانے اور دیگر امداد بہم پہنچائیں گے۔

ایئر ہیڈ کوارٹرز اسلام آباد میں فوکل پوائنٹ قائم کردیا گیا جب کہ فلڈ ریلیف ڈونیشن اکاؤنٹ بھی قائم کیا جارہا ہے۔

ترجمان پاک فضائیہ کے مطابق پاک فضائیہ نے سیلاب سے متاثرہ علاقوں کی بگڑتی ہوئی صورتحال کے پیش نظر سیلاب کی امدادی مہم میں مزید تیزی لانے کا فیصلہ کیا ہے۔

یہ بھی پڑھیے

جاز کا سیلاب متاثرین کی معاونت کیلئے ایک ارب روپے کی امداد کااعلان

سکھر کے قبرستان تالاب کا منظر پیش کرنے لگے ، متعدد قبریں غائب

سربراہ پاک فضائیہ نے تمام بیسز کو ہدایت کی ہے کہ وہ مقامی سول حکام کے ساتھ مل کر سیلاب سے متاثرہ افراد کی مدد کریں۔

سیلاب متاثرین کی امداد کے لیے پی اے ایف فلڈ ریلیف ڈونیشن اکاؤنٹ قائم کیا جا رہا ہے۔

چیف آف دی ایئر اسٹاف کی انسانی امداد اور قدرتی آفات سے متعلق امدادی مہم کا مقصد زمینی راستوں کے کٹ جانے کی وجہ سے  دور دراز علاقوں میں پھنسے ہوئے سیلاب متاثرین تک پہنچ کر انہیں بروقت امداد فراہم کرنا ہے۔

پی اے ایف کی تمام برانچز کو ہدایت کی گئی ہے کہ وہ اس مہم کے لیے بھرپور کوشش اور تعاون فراہم کریں۔

امدادی کارروائیوں کی کارکردگی پر نظر رکھنے کے لیے ایئر ہیڈ کوارٹرز اسلام آباد میں ایک فوکل پوائنٹ بھی قائم کیا گیا ہے۔

ترجمان پاک فضائیہ کے مطابق موثر انتظام کے لیے ریجنل ایئر کمانڈز کے تحت 03 ریلیف زونز قائم کیے گئے ہیں جبکہ پی اے ایف ایئر موبلٹی کمانڈ کے 25 سے زائد ہیلی کاپٹرز اور 08 سی۔130 طیارے ناقابل رسائی علاقوں تک فوری رسائی کے لیے استعمال کیے جائیں گے۔ اس کوشش کے لیے ایک ایئر سپورٹ برج قائم کیا جا رہا ہے۔

مراکز امدادی مہم کے تحت بےگھر افراد کے لیے خیمہ بستیاں قائم کی جا رہی ہیں جہاں انھیں مفت خوراک، رہائش اور طبی سہولیات فراہم کی جا رہی ہیں۔

ڈیزاسٹر ریلیف سیل میں قائم پی اے ایف ہیلپ ڈیسک سے سیلاب سے متعلق کسی بھی قسم کی معلومات اور امداد کے لیے 051-9260835 اور 051-9262404 پر رابطہ کیا جا سکتا ہے۔