اینکر کامران خان کی عمران خان سے حوالے سے ٹوئٹ پر سعد رفیق کا شدید ردعمل

مسلم لیگ نون کے رہنما وفاقی وزیر برائے ریلوے خواجہ سعد رفیق نے سینئر اینکر پرسن کامران خان کی جانب سے پی ٹی آئی کے سربراہ عمران خان سے متعلق  ٹوئٹ پر سخت ردعمل دیتے ہوئے کہا ہے کہ اینکر پرسن کے رویے سے آئین اور ریاست کی ساکھ کو نقصان پہنچا۔

پاکستان مسلم لیگ نواز (پی ایم ایل این) کے مرکزی رہنما اور وفاقی وزیر خواجہ سعد رفیق نے سینئراینکر پرسن کامران خان کی جانب سے پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کے حوالے سے سیاسی کشمکش  دور کرنے کی درخواست پر شدید ردعمل کا اظہار کیا ہے۔

یہ بھی پڑھیے

پنجاب حکومت میں دو صحافی زیرعتاب، ایک خلاف ایف آئی آر درج دوسرے کو قتل کی دھمکی موصول

اینکر پرسن کامران خان نے ٹوئٹر پر لکھا کہ وہ ایک عام پاکستانی کی حیثیت سے بااثر اداروں سے درخواست کرنا چاہتے ہیں کہ وہ پی ٹی آئی کے سربراہ عمران خان پر غیر ضروری پابندیاں لگانے سے گریز کریں۔

انہوں نے کہا کہ سخت پابندیاں لگا کر عمران خان کے سیاسی کیریئر کو ختم کرنے کی کوششوں سے ان کرپٹ سیاستدانوں کے لیے میدان خالی ہوگا جنہوں نے عوام کا کھربوں کا پیسہ لوٹا ہے۔ انہوں نے پیش گوئی کی کہ ایسی کوششوں سے ملک میں حقیقی انقلاب آئے گا۔

بااثر اداروں وشخصیات سے میں ایک ادنیٰ پاکستانی گزارش کرنا چاہوں گا عمران خان پر پابندیوں ہاتھ پیر باندھنے کا مقصد صرف عمران خان کا گلا گھونٹ کر مانے جانے قوم کے اربوں کھربوں لوٹ لینے والے کرپٹ سیاستدانوں کے لئیے اقتدار کا میدان خالی کرنا ثابت ہوا تو حقیقی انقلاب آئے گا

— Kamran Khan (@AajKamranKhan) September 5, 2022

سینئر اینکر پرسن  کامران خان کی ٹوئٹ پر اپنا ردعمل دیتے ہوئے وفاقی وزیر خواجہ سعد رفیق نے کہا کہ عمران سے سازشی جھوٹے کو مہاتما کے درجہ پر فائز کرنے اورعوام الناس کو گمراہ کرنے کے کھلواڑ میں آپ اورآپ سے دوسرے برابر کے شریک ہیں۔

محترمی! عمران سے سازشی جھوٹے کو مہاتما کے درجہ پر فائز کرنے اورعوام الناس کو گمراہ کرنے کے کھلواڑ میں آپ اورآپ سے دوسرے برابر کے شریک ھیں
آزادئِ صحافت کی آڑ میں آپ سے سینئر لوگوں نے اصولوں اور اخلاقیات کی دھجیاں اڑائیں -افسوس آپکے رویے نے جمہور آئین اور ریاست کو نقصان پہنچایا🙏

— Khawaja Saad Rafique (@KhSaad_Rafique) September 5, 2022

انہوں نے کہا کہ آزادی صحافت کی آڑ میں آپ سے سینئر لوگوں نے اصولوں اور اخلاقیات کی دھجیاں اڑائیں ۔ انہوں نے افسوس کا اظہار کیا کہ اینکر پرسن کے رویے سے آئین اور ریاست کی ساکھ کو نقصان پہنچا۔

تجزیہ کاروں کا کہنا تھا کہ رفیق کو صحافی کے خلاف تنقید شروع کرنے سے پہلے اپنے بیان کو درست طریقے سے تولنا چاہیے کیونکہ ان کی اپنی سیاسی جماعت اور اس کے اتحادیوں نے پاور میٹرکس کے خلاف الزام تراشی کا کھیل کھیلا اور بعض اوقات انہی لوگوں سے مدد مانگی۔