امیرالبحر کی زیرصدارت نیول ہیڈکوارٹرز میں کمانڈ اینڈ اسٹاف کانفرنس کا انعقاد

اسلام آباد: پاک بحریہ کی کمانڈ اینڈ اسٹاف کانفرنس نیول ہیڈکوارٹرز اسلام آباد میں اختتام پذیر ہوگئی۔ کانفرنس کی صدارت چیف آف دی نیول اسٹاف ایڈمرل محمد امجد خان نیازی نے کی۔

کانفرنس کے دوران خطے کی جیو اسٹریٹیجک صورتحال، قومی سلامتی، پاک بحریہ کی آپریشنل تیاریوں، جوانوں کی تربیت اور فلاحی منصوبوں کا جائزہ لیا گیا۔

یہ بھی پڑھیے

اعظم سواتی کی ایک ہفتے میں دوسری پریس کانفرنس: اداروں پر الزامات تیزتر

سندھ کو سیلاب سے 1.8کھرب روپے کا نقصان ہوا، سندھ کابینہ کوبریفنگ

امیرالبحر کو پاک بحریہ کے جاری اور مستقبل کے اہم منصوبوں پر تفصیلی بریفنگ بھی دی گئی۔

نیول چیف نے پاک بحریہ کی جنگی تیاریوں اور میری ٹائم کے شعبے میں پاک بحریہ کی خدمات کو سراہا۔

انہوں نے بحری سیکیورٹی کو مضبوط بنانے اور جنگی تیاریوں کو برقرار رکھنے پر زور دیا تاکہ پاکستان کے خلاف کسی بھی جارحیت کا موثر جواب دیا جاسکے۔

امیرالبحر نے جدید ٹیکنالوجیز کے حصول سے پاک بحریہ کی صلاحیتوں میں اضافے کے لیے کیے گئے اقدامات کو بھی سراہا۔

نیول چیف نے ملکی بحری سرحدوں کی حفاظت میں درپیش چیلنجز سے نمٹنے کے لیے پاک بحریہ کی آپریشنل تیاریوں پر اطمینان کا اظہار کیا۔

انہوں نے سول انتظامیہ اور فلاحی تنظیموں کے تعاون سے سیلاب متاثرین کو مسلسل امداد فراہم کرنے پرفیلڈ کمانڈرز کی کوششوں کو بھی سراہا.

کمانڈ اینڈ اسٹاف کانفرنس پاک بحریہ کا اعلیٰ فیصلہ ساز فورم ہے جس میں امیرالبحر کی سربراہی میں پرنسپل اسٹاف آفیسرز اور فیلڈ کمانڈرز پاک بحریہ کی پالیسیوں اور منصوبہ بندی کا جائزہ لیتے ہیں۔