عمران خان پر حملے کی فوٹیج بنانے والا سنی جیمز گمنام ہیرو قرار

تحریک انصاف کے سربراہ عمران خان پر گزشتہ روز وزیرآباد میں ہونے والے حملے کی لمحہ بہ لمحہ فوٹیج بنانے والے کیمرا مین سنی جیمز کو سوشل میڈیا پر زبردست خراج تحسین  پیش کیا جارہا ہے ، صارفین نے اسے گمنام ہیرو قرار دیدیا۔

کیمرا مین سنی جیمز کا تعلق نجی ٹی وی چینل نیو نیوز سے ہے اور وہ حملے کے وقت اپنی ڈی ایس این جی پر کھڑا ہوکر وڈیو بنانے میں مصروف تھا۔

یہ بھی پڑھیے

وزیراعلیٰ پنجاب کا نوٹس بےاثر، عمران خان پر حملہ آور ملزم کا دوسرا بیان بھی باہر آگیا

نیو نیوز کے رپورٹر ارسلان جٹ نے وزیرآباد میں تحریک انصاف کے لانگ مارچ پر حملے کی مکمل فوٹیج بنانے والے اپنے کیمرا مین سنی جیمز کی تصویر اپنے ٹوئٹر ہینڈل پر شیئر کردی۔

کیمرہ مینز کو کبھی کریڈٹ نہیں ملتا لیکن ہمارے کیمرہ مین سنی جیمز کو سلام ہے کہ فائرنگ کرنے والے سارے منظر نامے کی ویڈیو گاڑی پر کھڑے ہوکر بنایا جس کی وجہ سے سارا منظرنامہ ریکارڈ ہوگیا جو اب ہر جگہ چل رہا ہے فائرنگ کے باوجود اوپر کھڑا رہا pic.twitter.com/dIoHeO25B0

— Arslan Jutt (@ArslanJutt43) November 3, 2022

ارسلان جٹ نے لکھا کہ کیمرا مینز کو کبھی کریڈٹ نہیں ملتا لیکن ہمارے کیمرامین سنی جیمز کو سلام ہے کہ انہوں نے فائرنگ  کےواقعے کی وڈیو گاڑی پر کھڑے ہوکر بنائی  جس کی وجہ سے سارا منظر ریکارڈ ہوگیا جو اب ہر جگہ چل رہا ہے۔انہوں نے لکھاکہ  فائرنگ کے باوجودسنی جیمز گاڑی کے اوپر کھڑا رہا۔

ذرائع کے مطابق صرف نیو نیو ز کا کیمرا  مین ہی اس واقعے کو اتنا قریب سے ریکارڈ کرنے میں کامیاب رہا تھا،بعد ازاں سنی جیمز نے ہی تمام ٹی وی چینلز کے نمائندوں کویہ وڈیو فراہم کی تھی۔

ارسلان جٹ کے اس ٹوئٹ کوپر 23 ہزار کے قریب صارفین نے  پسندیدگی کا اظہار کیا ہے جبکہ صارفین کی اکثریت نے  انہیں حقیقی آزادی کی جدوجہد کا گمنام ہیرو قرار دیدیا۔