جنرل باجوہ نے کس طرح عمران خان کی مدد کی سب سامنے آرہا ہے، وزیر اعظم

وزیر اعظم شہباز شریف کا کہنا ہے کہ جنرل ریٹائرڈ قمر جاوید باجوہ نے کس طرح عمران خان کی مدد کی وہ سب سامنے آ رہا ہے۔

ہزارہ الیکٹرک سپلائی کمپنی کے منصوبے کی افتتاحی تقریب سے خطاب کرتے ہوئے وزیراعظم شہباز شریف کا کہنا تھا کہ افواج پاکستان نے ساری کاوشیں جھونک دیں تاکہ عمران خان کامیاب ہو، جنرل (ر)باجوہ نے کوشش کی کہ عمران خان کے ذریعے پاکستان آگے بڑھے لیکن بطور وزیراعظم وہ ناکام ثابت ہوئے۔

یہ بھی پڑھیے

ارشد شریف قتل کیس: تحقیقاتی ٹیم سےآئی ایس آئی کے افسر کو نکالنے کی استدعا مسترد

وزیر اعظم شہباز شریف نے مزید کہا کہ عمران خان سے بڑا منافق اور محسن کش شخص نہیں دیکھا، عمران خان کے کرتوت سب کے سامنے ہیں۔

انہوں نے مزید کہا کہ جن لوگوں نے عمران خان کو مسند اقتدار پر بٹھایا ان پر ہی عمران خان الزامات لگا رہا ہے، آج عمران خان جنرل باجوہ کے لیےکیا الفاظ استعمال کر رہے ہیں؟ گالم گلوچ میں عمران خان کا کوئی مقابلہ نہیں ہے، عمران خان نے پاکستان کے معاشرے کو تباہ کر دیا ہے۔

وزیراعظم کا کہنا تھا ہمارے مربی برادر ممالک جنہوں نے پاکستان کا ہمیشہ ساتھ دیا، اس شخص نے انہیں بری طرح ناراض کیا، میں وہ باتیں یہاں نہیں رکھ سکتا کیونکہ میرا منصب اس کی اجازت نہیں دیتا، اگر میں ذرا سی بات کر دوں تو آپ اپنی انگلیاں دانتوں سے کاٹ لیں گے۔

انہوں نے کہا کہ آج اس شخص کی وجہ سے پاکستان تباہی کا شکار ہے، ہمیں یہ اندازہ تھا کہ حالات خراب ہیں لیکن اس قدر خراب ہوں گے اس کا اندازہ نہیں تھا۔