جی سی یونیورسٹی فیصل آباد کے وائس چانسلر ٹریفک حادثے میں جاں بحق

گورنمنٹ کالج یونیورسٹی (جی سی یو) فیصل آباد کے وائس چانسلر پروفیسر ڈاکٹر شاہد کمال پیر کے روز موٹر وے پر کار حادثے میں جاں بحق ہو گئے۔

ریسکیو اور مقامی ذرائع سے ملنے والی اطلاعات کے مطابق ڈاکٹر شاہد کمال لاہور سے فیصل آباد جا رہے تھے کہ ساہیانوالہ کے قریب ان کی گاڑی کو حادثہ پیش آیا۔ زخموں کی تاب نہ لاتے ہوئے پروفیسر ڈاکٹر شاہد کمال موقع پر ہی دم توڑ گئے ، جبکہ ان کے ڈرائیور شدید زخمی ہو گئے ، جنہیں الائیڈ ہسپتال فیصل آباد منتقل کر دیا گیا ہے۔

یہ بھی پڑھیے

موسمی تبدیلی کی سب سے بڑی وجہ درختوں کی کمی ہے، وائس چانسلر گومل یونیورسٹی

پروفیسر ڈاکٹر شاہد کمال شماریات کے شعبے میں بین الاقوامی سطح پر مانے جانے والے اسکالر تھے۔

انہوں نے یونیورسٹی آف ایکسیٹر، ڈیون، یونائیٹڈ کنگڈم (یو کے) سے اپلائیڈ بائیو اسٹیٹسٹکس میں پی ایچ ڈی کی ڈگری حاصل کی تھی۔

انہیں تدریس، تحقیق اور انتظامیہ کا 30 سال سے زیادہ کا تجربہ تھا۔ انہوں نے پنجاب یونیورسٹی لاہور میں ڈین، ڈائریکٹر، پرنسپل اور پروفیسر کے طور پر خدمات انجام دیں۔

انہوں نے آپریشن ریسرچ سینٹر اور شماریاتی ڈیٹا بینک سمیت بہت سے ادارے اور مراکز تیار کیے۔

پروفیسر ڈاکٹر شاہد کمال نے پنجاب یونیورسٹی میں کئی ماسٹر ڈگری پروگرام شروع کئے۔ وہ دو کتابوں کے مصنف بھی تھے۔ ان کے تحقیقاتی مکالے اور مضامین معروف قومی اور بین الاقوامی تحقیقی جرائد میں شائع ہوتے رہے ہیں۔

انہوں نے ایم فل اور پی ایچ ڈی کی سطح پر بہت سے ریسرچ اسکالرز کی نگرانی بھی کی۔ انہوں نے 24 جولائی 2019 کو جی سی یونیورسٹی فیصل آباد کو بطور وائس چانسلر (وی سی)  جوائن کیا تھا۔