میڈیکل رپورٹ سے متعلق دعوے: عمران خان نے عبدالقادر پٹیل کو 10 ارب کا قانونی نوٹس بھیج دیا
چیئرمین تحریک انصاف کی جانب سے بھیجے گئے نوٹس میں عبدالقادر پٹیل سے 15 دن اندر اندر اپنے الزامات واپس لینے کا مطالبہ کیا گیا ہے۔
چیئرمین تحریک انصاف اور سابق وزیراعظم عمران خان نے اپنی میڈیکل رپورٹ سے متعلق پریس کانفرنس کرنے پر وفاقی وزیر صحت عبدالقادر پٹیل کو 10 ارب روپے ہرجانے کا نوٹس بھجوا دیا ہے۔
تحریک انصاف کے چیئرمین عمران خان نے اپنے وکیل ابوذر سلمان نیازی کے ذریعے قانونی نوٹس بھجوایا ہے۔
سابق وزیر اعظم کی جانب سے بھیجے گئے نوٹس میں وفاقی وزیر صحت سے کہا گیا ہے کہ وہ 15 دن میں اپنے الزامات واپس لیں، فوری طور پر ان سے غیر مشروط معافی مانگیں یا 10 ارب روپے ہرجانہ ادا کریں۔
یہ بھی پڑھیے
پی ٹی آئی چھوڑنے کے بعد ابرارالحق کو لندن میں آرمی چیف کے حق میں گانا گانا مہنگا پڑ گیا
میڈیا ٹاک اس لیے نہیں کررہا کہ پارٹی چھوڑ کر جارہا ہوں، عمران خان کی حسِ مزاح قائم
نوٹس میں کہا گیا کہ ہرجانہ شوکت خانم میموریل ہسپتال (SKMH) میں جمع کرایا جائے گا۔
نوٹس میں لکھا ہے کہ ’’اگر عبدالقادر پٹیل معافی نہیں مانگتے ہیں تو قانونی کارروائی کی جائے گی۔‘‘
واضح رہے کہ گذشتہ ہفتے پریس کانفرنس کرتے ہوئے وفاقی وزیر صحت عبدالقادر پٹیل نے دعویٰ کیا تھا کہ عمران خان کی ابتدائی میڈیکل رپورٹ کے نمونے میں ’شرابی اور کوکین‘ پائی گئی ہے۔
وفاقی وزیر صحت عبدالقادر پٹیل نے الزام لگایا ہے کہ پاکستان تحریک انصاف (پی ٹی آئی) کے چیئرمین عمران خان سے متعلق میڈیکل رپورٹس میں الکحل اور کوکین کے استعمال کا انکشاف ہوا ہے جبکہ میڈیکل رپورٹ میں سابق وزیراعظم کو ذہنی طور پر غیر مستحکم قرار دیا گیا ہے۔
یاد رہے یہ چونکا دینے والے انکشافات انہوں نے جمعہ کے روز اسلام آباد میں پریس کانفرنس کرتے ہوئے کئے تھے۔ انہوں نے انکشاف کیا کہ عمران خان کی گرفتاری کے بعد انہیں اسپتال لے جایا گیا جہاں ان کا طبی معائنہ کیا گیا جس میں پیشاب کے نمونوں کا تجزیہ بھی شامل ہے اور رپورٹ کے ابتدائی نتائج میں منشیات کے استعمال کی نشاندہی کی گئی۔ اس کے بعد عمران خان کے اضافی ٹیسٹوں کے نتائج میں الکوحل اور کوکین کے استعمال کی تصدیق ہوئی ہے۔
