عدالت نے پرویز الٰہی کی رہائی کے حکم پر عملدرآمد کا حکم دے دیا

لاہور کی انسداد بدعنوانی عدالت (اے سی سی) نے سابق وزیراعلیٰ پنجاب پرویز الٰہی کی رہائی کے حکم پر عملدرآمد کا حکم دیتے ہوئے جیل حکام سے اس حوالے سے رپورٹ طلب کر لی۔

جیل حکام نے پنجاب اسمبلی میں بھرتیوں میں بدعنوانی کے کیس میں چوہدری پرویز الٰہی کی رہائی کے آرڈر پر اعتراض اٹھایا تھا۔

جیل حکام نے پرویز الٰہی کی ضمانت منظور ہونے کے باوجود انہیں رہا نہیں کیا تھا۔

یہ بھی پڑھیے 

لاہور ہائیکورٹ نے خدیجہ شاہ کی نظر بندی کو غیر قانونی قرار دینے کی درخواستیں مسترد کر دیں

لاہور کے علاقے اندرون بھاٹی گیٹ میں گھر میں آگ لگ گئی، 10 افراد جاں بحق

پولیس حکام نے اینٹی کرپشن کورٹ سے استدعات کی وہ عدالتی حکم کو نہیں سمجھ سکتے، اور اس کی وضاحت چاہتے ہیں۔

جیل حکام نے عدالتی حکم کی وضاحت کے لیے اینٹی کرپشن کورٹ میں درخواست دائر کر دی۔

عدالت نے کیمپ جیل سپرنٹنڈنٹ اور ڈپٹی سپرنٹنڈنٹ کو شوکاز نوٹس جاری کر دیا۔

عدالت نے ڈپٹی انسپکٹر جنرل جیل کو بھی طلب کرتے ہوئے کیس کی کارروائی 14 جولائی تک ملتوی کر دی۔

عدالت نے ریمارکس دیے کہ پہلے رہائی کے حکم پر عمل درآمد کیا جائے پھر شوکاز نوٹس پر غور کیا جائے گا۔

انسداد بدعنوانی کے جج علی رضا نے سماعت کی جس میں جیل سپرنٹنڈنٹ بھی موجود تھے۔

عدالت نے برہمی کا اظہار کیا کہ رہائی کا حکم جاری ہونے کے باوجود عملدرآمد کیوں نہیں ہوا۔

جج نے غصے سے سوال کیا کہ ’’کیا پولیس عدالتوں سے بڑی ہے؟‘‘۔ ’’اگر آپ رہائی کے حکم کو نہیں سمجھ سکتے تو اپنی نوکری چھوڑ دیں۔‘‘