لاہور میں سی ٹی ڈی کی مختلف کارروائیاں، 7 دہشتگرد گرفتار

ملک بھر حالیہ دہشت گرد کے واقعات کے پیش نظر پنجاب میں سیکورٹی سخت کر دی گئی ہے، پنجاب کے صوبائی دارالحکومت لاہور میں سی ٹی ڈی نے دہشت گردوں کے خلاف کارروائیاں تیز کرتے ہوئے شہر سے 7 دہشتگردوں کو گرفتار کرلیا ہے۔

تفصیلات کے مطابق سی ٹی ڈی حکام کا کہنا ہے کہ گرفتار دہشتگردوں کا تعلق کالعدم تنظمیوں سے ہیں۔ گرفتار دہشت گردوں کے قبضے سے بھاری مقدار گولہ بارود اور جدید اسلحہ بھی برآمد ہوا ہے۔

کاؤنٹر ٹیررازم ڈیپارٹمنٹ کے حکام کے مطابق گرفتار دہشت گردوں کی شناخت خالد ، محسن ، عثمان ، شیر محمد ، لقمان اور فاروق کے ناموں سے ہائی ہے۔

ترجمان سی ٹی ڈی کے مطابق پنجاب کے صوبائی دارالحکومت لاہور سے گرفتار کئے گئے دہشتگردوں سے بارودی مواد، اسلحہ، ممنوعہ لٹریچر بھی برآمد ہوا ہے ملزمان پنجاب میں دہشت گردی کی منصوبہ بندی میں ملوث ہیں۔

ترجمان کے مطابق سی ٹی ڈی نے پنجاب کے مختلف شہروں میں اس ہفتے 443 کوبنگ آپریشن کئے ہیں۔

دوسری جانب انسپکٹر جنرل پولیس پنجاب عامر ذوالفقار خان نے دہشت گردی کے حالیہ واقعہ کے پیش نظر صوبہ بھر میں سکیورٹی ہائی الرٹ کرنے کے احکامات جاری کئے ہیں۔

آئی جی پنجاب نے ہدایات جاری کی ہیں کہ صوبائی دارالحکومت لاہور سمیت تمام اضلاع میں حساس و عوامی مقامات کے سیکورٹی انتظامات مزید سخت کیے جائیں۔

آئی جی پنجاب نے تمام اضلاع کے فیلڈ افسران کو سیکورٹی انتظامات پر خصوصی توجہ دینے کی ہدایت دیتے ہوئے کہا کہ آر پی اوز اور ڈی پی اوز اپنے اضلاع میں اہم تنصیبات، عبادت گاہوں، اسپتالوں اور پارکوں سمیت دیگر حساس مقامات کے سکیورٹی انتظامات کو مزید بہتر بنائیں۔

عامر ذوالفقار خان نے کہا کہ تمام اضلاع میں سرچ، سویپ اور کو مبنگ آپریشنز میں مزید تیزی لائی جائے اور بین الصوبائی اور بین الاضلائی چیک پوسٹوں پر چیکنگ کا عمل مزید مؤثر بنایا جائے۔

آئی جی پنجاب نے ہدایت کی کہ اسپیشل برانچ اور سی ٹی ڈی انٹیلیجنس بیسڈ آپریشن میں تیزی لائیں اور سماج دشمن و شدت عناصر کے قلع قمع میں ضلعی پولیس ٹیموں کو ہر ممکن معاونت فراہم کریں۔