پرویز الہیٰ پی ٹی آئی کے صدر مقرر، عمران خان کا جانشین کون ہوگا؟

حال ہی میں پاکستان تحریک انصاف (پی ٹی آئی) میں شامل ہونے والے سابق وزیراعلیٰ پنجاب چوہدری پرویز الٰہی کو منگل کے روز عمران خان نے باضابطہ طور پر پارٹی کا صدر مقرر کر دیا ہے ، کنفیوژن یہ پیدا ہو گئی ہے کہ عمران خان پارٹی کے چیئرمین اور شاہ محمود قریشی وائس چیئرمین ہیں تو پرویز الہیٰ کی پارٹی میں دوسری پوزیشن ہے یا تیسری واضح نہیں ہورہا۔

پی ٹی آئی کے سربراہ عمران خان نے گذشتہ روز اپنے دستخط  والے نوٹی فیکیشن میں کہا ہے کہ چوہدری پرویز الٰہی کو پاکستان تحریک انصاف کا صدر نامزد کیا جاتا ہے۔

یہ بھی پڑھیے

کیا مریم نواز عمران خان کی بارہویں کھلاڑی بن گئیں؟

مقدمات  کی سنچری کی جانب بڑھ رہا ہوں، عمران خان

اس موقع پر سابق وزیراعلیٰ پنجاب چوہدری پرویز الہیٰ نے ان پر اعتماد کرنے پر پی ٹی آئی سربراہ عمران خان کا شکریہ ادا کیا۔

چوہدری پرویز الہیٰ نے اس موقع پر اپنے ٹوئٹر ہینڈل پر لکھا ہے کہ "آئین اور قانون کی بالادستی کی جنگ میں عمران خان کے ساتھ کھڑا ہوں گا۔ حکومت کے لیے عمران کا راستہ روکنا ممکن نہیں کیونکہ وہ اب لوگوں کے دلوں میں بستے ہیں۔‘‘

عمران خان نے جو اعتماد کیا اس کیلئے شکرگزار ہوں۔عمران خان کے ساتھ ڈٹ کر آئین اور قانون کی سربلندی کی جدوجہد کریں گے۔عمران خان ملک میں آئین اورقانون اورعام آدمی کی جنگ لڑ رہے ہیں۔عمران خان کا راستہ روکنا حکومت کے بس کی بات نہیں وہ عوام کے دلوں میں بس چکے ہیں۔ pic.twitter.com/mEEOfKFBmj

— Ch Parvez Elahi (@ChParvezElahi) March 7, 2023

یاد رہے کہ گزشتہ ماہ چوہدری پرویز الہیٰ نے اپنے 10 سابق صوبائی اراکین اسمبلی سمیت پاکستان تحریک انصاف میں شمولیت اختیار کی تھی۔ یہ اقدام پنجاب کے موجودہ سیاسی منظر نامے پر گہری نظر رکھنے والوں کے لیے غیر متوقع نہیں تھا۔

چوہدری پرویز الہیٰ کا یہ اعلان پاکستان مسلم لیگ قائد (پی ایم ایل-ق) کے صدر چوہدری شجاعت حسین کی جانب سے انہیں پارٹی کے پنجاب کے صدر کے عہدے سے برطرف اور ان کی بنیادی رکنیت منسوخ کرنے کے بعد سامنے آیا تھا۔

پی ٹی آئی کے سینئر نائب صدر فواد چوہدری کے ہمراہ مشترکہ نیوز کانفرنس سے خطاب کرتے ہوئے پرویز الٰہی نے کہا تھا کہ انہوں نے ہمیشہ پی ٹی آئی کے چیئرمین اور سابق وزیراعظم عمران خان کو اچھے اور برے وقت میں سپورٹ کیا ہے۔

انہوں نے کہا تھا کہ ہم عمران خان کے ساتھ کھڑے تھے اور آئندہ بھی ان کے ساتھ کھڑے رہیں گے۔ ہمیں ان کی قیادت پر پورا اعتماد ہے اور ہم ان کے شکر گزار ہیں کہ انہوں نے ہمیں یہ موقع فراہم کیا۔

پی ٹی آئی میں شامل ہونے والے سابق ایم پی ایز میں حافظ عمار یاسر، شجاعت نواز، عبداللہ وڑائچ، باؤ رضوان، ساجد بھٹی، احسن الحق، محمد افضل، بسمہ چوہدری اور خدیجہ عمر فاروقی تھیں۔

یہ بھی یاد رہے کہ 77 سالہ چوہدری الٰہی پی ٹی آئی کی حمایت سے دوسری بار پنجاب کے وزیر اعلیٰ بنے تھے، جب انہوں نے تحریک عدم اعتماد کے ذریعے پی ٹی آئی کے سربراہ کی وزارت عظمیٰ سے برطرفی سے عین قبل عمران کا ساتھ دیا تھا۔