عمران خان کو عدلیہ کی سہولت کاری حاصل ہے ، مریم نواز کا تحریک انصاف کی سپریم کورٹ میں درخواست کی سماعت سے قبل الزام

مسلم لیگ (ن) کی چیف آرگنائزر مریم نواز نے کہا ہے کہ نوازشریف سے ناانصافیاں کی گئیں، نواز شریف کے ووٹ کو عزت دو کے بیانیہ کو آگے بڑھانے میں وکلاء کا اہم کردار ہے۔ الیکشن کے علاوہ مسائل کا کوئی حل نہیں، ہر 5 سال بعد انتخابات ہونے چاہئیں۔

ان خیالات کا اظہار پاکستان مسلم لیگ (ن) کی سینئر نائب صدر مریم نواز کا لاہور میں مسلم لیگ ن کے لائرز ونگ کے ساتھ خطاب کرتے ہوئے کیا۔ ان کا کہنا تھا پی ٹی آئی نے اب جوڈیشل اسٹیبلشمنٹ پر تکیہ کرلیا ہے، ن لیگ سلیکٹ نہیں ایلیکٹ ہوکر آتی ہے، عمران خان عدالتوں پر جتھے لے کر حملہ آور ہوا، ملکی تاریخ میں کب کسی کو ایسی سہولت حاصل تھی؟ بیگمات اور بچوں کے کہنے پر فیصلے کیے جارہے تھے۔

انہوں نے کہا ہے کہ عمران کو 12 مقدمات میں 5 منٹ میں ضمانت ملتی ہے،عمران خان ٹیریان خان کا مقدمہ نہ اگل سکتا ہے نہ نگل سکتا ہے، عمران خان نے توشہ خانہ کے تحائف خریدے نہیں بلکہ چوری کیے، پی ٹی آئی کی سیاست تقریروں کے ارد گرد گھومتی ہے، پی ٹی آئی کی پوری سیاست سہولت کاروں کے گرد گھومتی ہے۔

یہ بھی پڑھیے

پاکستان میں جبری گمشدگیوں کا سلسلہ بند ہونا چاہیے، کل کے جلسے پر اہلیان لاہور کے شکرگزار ہیں،تحریک انصاف

لاہور میں لائرز ونگ کے عہدیداران سے خطاب کرتے ہوئے مریم نواز نے کہا کہ نواز شریف کیساتھ زیادتیاں کی گئیں، میری والدہ کے الیکشن میں آپ سب نے ساتھ دیا، بہت جذبے کیساتھ آپ لوگوں نے مشکل وقت میں ساتھ دیا، نواز شریف کے بیانیے کو آگے بڑھانے میں آپ کا کردار واضح ہے، قیادت کی سطح پر آپ کو وہ توجہ نہیں ملی جو آپ کا حق تھا۔

مسلم لیگ (ن) کی رہنما نے مزید کہا کہ پی ٹی آئی کی پوری سیاست سہولت کاروں کے گرد گھومتی ہے، عمران خان جتھے لیکر عدالتوں پر حملہ آور ہوئے، عمران خان نے آئین و قانون کی دھجیاں اڑائیں، پاکستان کا قانون کہاں سو رہا ہے؟ ملک میں انصاف کے ترازو کے پلڑے برابر نہیں، ن لیگ کی قیادت نے جھوٹے مقدمات کا سامنا کیا، زمان پارک میں پولیس پر حملہ کیا گیا پٹرول بم پھینکے گئے۔

مریم نواز کا کہنا تھا کہ کون ہے جو آج بھی عمران خان کو بچا رہا ہے، عمران خان کی ساری سیاست اسٹیبلشمنٹ کے گرد گھومتی ہے، خان صاحب آپ کا دامن داغدار نہیں تو عدالتوں کے سامنے پیش ہوں، انتخابات ہی ملکی مسائل کا حل ہیں، ہر پانچ سال بعد الیکشن ہونے چاہئیں، ہم الیکشن سے فرار نہیں چاہتے ہم الیکشن کے لیے تیار ہیں۔