علی ظفر اور پنجاب حکومت کا قومی ہیروز کو خراج تحسین

ارشد ندیم، طلحہ طالب اور شہروز کاشف کو 10، 10 لاکھ روپے نقد انعام دیا گیا۔

پاکستان کے معروف گلوکار علی ظفر فاؤنڈیشن اور لاہور ضلعی انتظامیہ کے اشتراک سے نوجوان ایتھلیٹس اور خاتون کرکٹر کے اعزاز میں تقریب کا انعقاد کیا گیا جس میں انہیں انعامات سے نوازا گیا۔

علی ظفر کا شمار پاکستان کے ان فنکاروں میں ہوتا ہے جو نوجوانوں کے ٹیلنٹ کو بھرپور انداز میں سراہتے ہیں اور انہیں آگے لاتے ہیں۔ اس مرتبہ بھی علی ظفر نے کچھ ایسا ہی کیا۔لاہور میں علی ظفر فاؤنڈیشن اور ضلعی انتظامیہ کے اشتراک سے قومی ہیروز کے اعزاز میں فخر پاکستان کے نام سے ایک پروقار تقریب منعقد کی گئی جس میں انہیں انعام و اعزازات سے نوازا گیا۔

یہ بھی پڑھیے

علی ظفر پاک چین دوستی کے سفیر

تقریب میں ٹوکیو اولمپکس میں جیولین تھررو کے مقابلے میں فائنل میں پہنچ کر پانچویں پوزیشن لینے والے ایتھلیٹ ارشد ندیم، اولمپکس میں 67 کلو کی کیٹگری میں حصہ لیتے ہوئے پانچواں نمبر حاصل کرنے والے طلحہ طالب، کوچ فیاض بخاری ، اسلام نتیق، ماؤنٹ ایورسٹ سر کرنے والے سب سے کم عمر پاکستانی کوہ پیما شہروز کاشف، کرکٹر ندا ڈار اور عالیہ ریاض میں انعامات تقسیم کیے گئے۔ ان تمام قومی ہیروز کو انعامی رقم کے علاوہ اسناد بھی دی گئیں۔

حکومت پنجاب کے ٹوئٹر ہینڈل سے بتایا گیا کہ ارشد ندیم، طلحہ طالب اور شہروز کاشف کو 10، 10 لاکھ روپے نقد انعام دیا گیا۔ عالیہ ریاض اور ندا ڈار کے ساتھ ساتھ کوچ فیاض بخاری اور اسلام نتیق کو 5، 5 لاکھ روپے کی انعامی رقم دی گئی۔

اس پرمسرت موقعے پر علی ظفر نے تمام قومی ہیروز کی حوصلہ افزائی کی۔ طلحہ طالب نے علی ظفر کی جانب سے بھرپور حوصلہ افزائی پر ان کا شکریہ ادا کیا۔ جس پر علی ظفر نے جواباً کہا کہ آپ اس سے زیادہ کے حقدار ہیں۔

ایک اور ٹوئٹ میں علی ظفر نے ندا ڈار کی حوصلہ افزائی کرتے ہوئے لکھا کہ آپ ٹی20 میچز میں 100 وکٹس حاصل کرنے والی پاکستان کی پہلی کرکٹر ہیں۔ علی ظفر نے ندا ڈار کو مخاطب کرتے ہوئے کہا کہ آپ نے ثابت کردیا کہ خواتین بھی کسی سے کم نہیں بلکہ ہر لحاظ سے بہتر ہیں۔

Facebook Comments Box