کینیڈا میں اسلاموفوبیا نے پاکستانی خاندان کی جان لے لی

پچھلے چند برسوں میں مغربی ممالک میں رہنے والے کئی مسلمانوں کو تعصب کی بناء پر قتل کیا گیا لیکن آج تک کسی مغربی رہنما نے ایسے کسی واقعے کے لیے اسلاموفوبیا کی اصطلاح استعمال نہیں کی۔ کینیڈا میں 4 مسلمانوں کو دہشتگردی کا نشانہ بناتے ہوئے قتل کردیا گیا جس پر کینیڈین وزیراعظم نے سخت الفاظ میں واقعے کی مذمت کرتے ہوئے اسے اسلاموفوبیا قرار دیا ہے۔

کینیڈا میں ایک دہشتگرد نے پاکستانی خاندان کے 4 افراد کو موت کے گھاٹ اتار دیا۔ صوبہ اونٹاریو کے شہر لندن میں 20 سالہ شخص نے پک اپ ٹرک کو فٹ پاتھ پر چڑھا کر خاندان کو روند دیا۔ جاں بحق ہونے والوں میں 74 سالہ ماں، 46 سالہ بیٹا، 44 سالہ بہو اور 15 سالہ پوتی شامل ہیں۔ واقعے میں 9 سالہ بچہ بھی شدید زخمی ہوا جو اسپتال میں زیرعلاج ہے۔

ڈیٹیکٹیو سپرینٹنڈنٹ پال وائٹ نے خدشہ ظاہر کیا ہے کہ دہشتگرد مذہبی تعصب میں مبتلا تھا جبکہ پولیس نے کینیڈین دہشتگرد کو قتل کے 4 اور اقدام قتل کے ایک الزام میں گرفتار کرلیا ہے۔

کینیڈا کے وزیراعظم جسٹن ٹروڈو نے سماجی رابطوں کی ویب سائٹ ٹوئٹر پر پیغام میں لکھا کہ اونٹاریو کے شہر لندن میں ہونے والے اس واقعے نے انہیں ہلا کر رکھ دیا ہے۔ وہ اس مشکل کی گھڑی میں ملک میں موجود تمام مسلمانوں کے ساتھ کھڑے ہیں، اس بچے کے ساتھ بھی کھڑے ہیں جو اس وقت اسپتال میں داخل ہے۔

I’m horrified by the news from London, Ontario. To the loved ones of those who were terrorized by yesterday’s act of hatred, we are here for you. We are also here for the child who remains in hospital – our hearts go out to you, and you will be in our thoughts as you recover.

— Justin Trudeau (@JustinTrudeau) June 7, 2021

یہ بھی پڑھیے

فرانس مذہبی ہم آہنگی نیوزی لینڈ سے سیکھے

جسٹن ٹروڈو نے واضح کیا کہ کینیڈا میں اسلاموفوبیا کے لیے کوئی جگہ نہیں ہے۔ خاموشی سے پنپنے والی یہ نفرت انتہائی خطرناک ہے۔ اس نفرت کو جلد سے جلد ختم کرنا ہوگا۔

I spoke on the phone this evening with @LdnOntMayor and @NTahir2015 about the hateful and heinous attack that took place in London, Ontario yesterday. I let them know we’ll continue to use every tool we have to combat Islamophobia – and we’ll be here for those who are grieving.

— Justin Trudeau (@JustinTrudeau) June 8, 2021

وزیر اعلیٰ اونٹاریو ڈگ فورڈ نے بھی مقتولین کو خراج عقیدت پیش کیا۔ انہوں نے ٹوئٹ کیا کہ اونٹاریو میں نفرت اور اسلامو فوبیا کی کوئی جگہ نہیں ہے۔

Hate and Islamophobia have NO place in Ontario. Justice must be served for the horrific act of hatred that took place in London, Ontario yesterday.

My thoughts and prayers are with the families and friends during this difficult time. These heinous acts of violence must stop.

— Doug Ford (@fordnation) June 7, 2021

حیران کن طور پر ایسا پہلی مرتبہ ہوا ہے کہ کسی مغربی ملک میں مسلمانوں کا قتل کیا گیا ہو اور وہاں کے رہنماؤں نے اسے اسلاموفوبیا قرار دے کر اس قسم کے واقعات کی روک تھام کی بات کی ہو۔

وزیر اعظم عمران خان نے واقعے کی مذمت کرتے ہوئے ٹوئٹ کیا ہے کہ اسلاموفوبیا کی روک تھام کے لیے عالمی برادری کی جانب سے اقدامات کیے جانے کی ضرورت ہے۔

اونٹاریو کے علاقے لنڈن میں ایک پاکستانی نژاد مسلمان کینیڈین خاندان کے قتل پر بے حد افسردہ ہوں۔ دہشت گردی کا یہ قابل مذمت اقدام مغربی ممالک میں بڑھتے ہوئے اسلاموفوبیا کی علامت ہے جس کے (اسلاموفوبیا) تدارک کے لئے عالمی برادری کی جانب سے کلی طور پر اقدامات وقت کی اہم ضرورت ہیں۔

— Imran Khan (@ImranKhanPTI) June 8, 2021

واضح رہے کہ کینیڈا میں اس سے پہلے بھی مسلمانوں کے خلاف دہشتگردی کا واقعہ پیش آچکا ہے۔ سال 2017 میں کیوبک میں دہشتگرد نے مسجد میں 6 نمازیوں پر فائرنگ کر کے قتل کردیا تھا۔