پاک بحریہ سمندری طوفان بپرجوئے کے پیش نظر ہائی الرٹ

کراچی: پاک بحریہ نے سمندری طوفان بپرجوئے کے پیش نظر سندھ کے ساحلی علاقوں میں کسی بھی ہنگامی صورتحال سے نمٹنے اور بر وقت مدد فراہم کرنے کے لیے اپنے تمام وسائل اور مطلوبہ اثاثوں کے ساتھ ہمہ وقت تیار ہے۔

پا ک بحریہ کے دستوں نے شاہ بندر سے متصل گوٹھوں سے لگ بھگ 1000 افراد کی محفوظ مقام پر نقل مکانی میں مدد فراہم کی اور 64 ماہی گیروں کو سمندر سے ریسکیو کیا۔

یہ بھی پڑھیے 

پاک بحریہ کے جہاز ٹیپو سلطان کی انڈونیشیا میں کثیرالقومی مشق کموڈو-23 میں شرکت

عالمی یوم بحر 2023 کے موقع پر چیف آف دی نیول اسٹاف ایڈمرل محمد امجد خان نیازی کا پیغام

بدلتی صورت حال اور بر وقت امدادی کاروائیوں کی نگرانی کے لیے ہیڈ کوارٹر کمانڈر کراچی میں سائیکلون مانیٹرنگ سیل قائم کر دیا گیا ہے۔

پاک بحریہ جوائنٹ میری ٹائم انفارمیشن کوآرڈینیشن سینٹر کی جاری کردہ ہدایات کے مطابق تمام ا سٹیک ہولڈرز بلخصوص ماہی گیروں کو گہرے اور کھلے سمندر میں نہ جانے کے لیے متنبہہ کیا جا رہا ہے۔

پاک بحریہ کی ایمرجنسی رسپانس اور طبی ٹیمیں بلوچستان کے ساحلی اور سندھ کے دیہی علاقوں بشمول حیدرآباد، شہید بینظیر آباد، سکھر اور سانگھڑ میں ناگہانی صورت حال سے نمٹنے اور فوری امداد فراہم کرنے کے لیے تعینات کی گئیں ہیں۔

پاک بحریہ کے جہاز کھلے سمندر میں گشت کے دوران سمندروں میں پھنسی کشتیوں کو مدد فراہم کرنے میں سرگرم ہیں۔ کراچی میں پاک بحریہ کے اسپتالوں میں بھی ہنگامی صورتحال سے نمٹنے کے لیے ہائی الرٹ کر دیا گیا۔

سمندری طوفان بپرجوئے سے عوام کو محفوظ رکھنے کے لیے پاک بحریہ نیشنل ڈیزاسٹر منیجمنٹ اتھارٹی اور صوبائی و مقامی حکومتوں کے ساتھ مسلسل رابطے میں ہے تاکہ ضرورت کے پیشِ نظربر وقت مدد فراہم کی جاسکے۔