پریانکا چوپڑا وکٹوریہ سیکریٹ سے منسلک
برانڈ نے نئی اشتہاری مہم کے لیے مختلف شعبہ ہائے زندگی سے تعلق رکھنے والی بااختیار خواتین کو منتخب کیا ہے۔
بالی ووڈ اداکارہ پریانکا چوپڑا مشہور امریکی برانڈ وکٹوریہ سیکریٹ سے منسلک ہوگئیں ہیں۔ بیوٹی برانڈ کی نئی اشتہاری مہم کے لیے بااختیار خواتین کا انتخاب کیا گیا ہے۔
پریانکا چوپڑا کا شمار بالی ووڈ کی صف اول کی اداکاراؤں میں ہوتا ہے جبکہ ہالی ووڈ میں بھی وہ ان دنوں خوب نام کما رہی ہیں۔ ترقی کی منازل طے کرتی پریانکا چوپڑا اب عالمی شہرت یافتہ برانڈ وکٹوریہ سیکریٹ کی برانڈ ایمبیسیڈر بن چکی ہیں۔
وکٹوریہ سیکریٹ نے اپنی نئی اشتہاری مہم کے لیے مختلف شعبہ ہائے زندگی سے تعلق رکھنے والی بااختیار خواتین کو منتخب کیا ہے۔ سماجی رابطوں کی ویب سائٹ ٹوئٹر پر وکٹوریہ سیکریٹ نے برانڈ ایمبیسیڈر بننے والی تمام ساتوں خواتین کی تصویر بھی شیئر کی ہے۔
We are proud to announce an exciting new partnership platform, #TheVSCollective, designed to shape the future of Victoria’s Secret. @adutakech1 @amandadecadenet @mPinoe @priyankachopra Eileen Gu, Paloma Elsesser, Valentina Sampaio https://t.co/IdYrmLWkPM pic.twitter.com/bd9QMhCz2W
— Victoria’s Secret (@VictoriasSecret) June 16, 2021
یہ بھی پڑھیے
پریانکا چوپڑا جیمز بانڈ بننے کو تیار
وکٹوریہ سیکریٹ سے منسلک ہونے پر پریانکا چوپڑا کا کہنا ہے کہ ایک نیا دور ہمیشہ آزادی کا احساس دلاتا ہے اور وکٹوریہ سیکریٹ جیسے برانڈ کے مستقبل کو مزید روشن کرنے میں کردار ادا کرنا ان کے لیے ایک سنہری موقع ہے۔
سال 2019 کے سالانہ فیشن شو کے بعد برانڈ کو تمام سائز اور پس منظر کے ماڈل قبول نہ کرنے پر سخت تنقید کا سامنا کرنا پڑا تھا۔ چند ماڈلز نے وکٹوریہ سیکریٹ کے انتہائی بولڈ فیشن شو پر بھی تنقید کی تھی اور دعویٰ کیا تھا کہ انہیں نیم عریاں کیٹ واک پر مجبور کیا جاتا رہا ہے۔
گزشتہ برس وکٹوریہ سیکریٹ کے سابق چیف فنانشل ایگزیکٹو افسر ایڈورڈ ریزک پر 30 سے زائد خواتین ملازمین اور ماڈلز نے جنسی استحصال اور کام کے بدلے جنسی تعلقات استوار کرنے کے الزامات عائد کیے تھے جس سے برانڈ کی ساکھ کو شدید نقصان پہنچا تھا۔
