نیول چیف کی پی این ایس طارق اور تغرل پر جوانوں سے ملاقات

چیف آف نیول اسٹاف ایڈمرل امجد خان نیازی نے سمندر اور ساحلی علاقوں میں پاک بحریہ کے یونٹس اور کریک ایریاز میں واقع اگلے مورچوں کا دورہ کیا۔

دورے کا مقصد اہم میری ٹائم مشق سی اسپارک 2022 میں شامل جوانوں کی آپریشنل تیاریوں کا جائزہ لینا تھا۔

یہ بھی پڑھیے

کمانڈر سری لنکن نیوی کی پاکستان آمد، نیول چیف سے ملاقات

چیف آف نیول اسٹاف تیونس پہنچ گئے، سربراہ بحریہ اور وزیر دفاع سے ملاقات

اورماڑہ میں واقع جناح نیول بیس پہنچنے پر نیول چیف کو آپریشنل صورتحال اور مشق کے علاقے میں تعینات پاک بحریہ کے دستوں سے متعلق ایک جامع بریفنگ پیش کی گئی۔

ایڈمرل امجد نیازی نے سمندر میں پاک بحریہ کے جہازوں طارق اور طغرل کا دورہ کیا اور مشق کے مختلف مراحل اور سرگرمیوں میں شامل افسران اور جوانوں سے بات چیت کی۔

انہوں نے ساحلی علاقے میں سیکیورٹی اور دفاع کے لئے قائم سکیورٹی اسٹیشن کا دورہ کیا۔

کریک ایریا میں اگلے مورچوں کے دورے میں نیول چیف کو موجودہ خطرات اور کریک ایریا کے دفاع کے لیے جنگی تیاریوں اور حکمت عملی سے متعلق بریفنگ دی گئی۔

ایڈمرل امجد نیازی نے ہیڈ کوارٹر کریکس بریگیڈ کا بھی دورہ کیا اور پاک میرینز کے افسران اور جوانوں سے ملاقات کے دوران ملک کے دفاع میں ان کے عزم اور ہمت کو سراہا۔

سربراہ پاک بحریہ نے یونٹس کی آپریشنل تیاریوں کے ساتھ ساتھ افسروں اور جوانوں کی پیشہ وارانہ مہارت پر مکمل اطمینان کا اظہار کیا۔