اپریل کے مہینے میں مہنگائی کی شرح میں 13.4 فیصد اضافہ ریکارڈ

رواں مالی سال اب تک مہنگائی کی زد میں رہا، رواں مالی سال کے پہلے  10 ماہ میں مہنگائی کا راج،  اپریل میں مہنگائی کی ماہانہ شرح 13.4 فیصد ریکارڈ کی گئی۔ پہلے 10 ماہ میں مہنگائی کی سالانہ شرح 11 فیصد ریکارڈ کی گئی۔ وزارت خزانہ نے اپنی رپورٹ میں اعتراف کرلیا۔

اسلام آباد سے  وزارت خزانہ نے معیشت پر ماہانہ اپ ڈیٹ آوٹ لک رپورٹ جاری کر دی ہے۔  جس میں اعتراف کیا گیا ہے کہ  اپریل میں مہنگائی کی ماہانہ شرح 13.4 فیصد ریکارڈ کی گئی۔

یہ بھی پڑھیے

وزیراعظم کی ہدایت پر یوٹیلیٹی اسٹورز کارپوریشن کا یوٹرن، آٹے کی قیمت میں اضافہ واپس

پاکستان کو رواں برس 3.16ارب ڈالر کا غیر ملکی قرض چکانا ہے، بلومبرگ

رواں سال کے پہلے 10 ماہ میں مہنگائی کی سالانہ شرح 11 فیصد تھی۔ وزارت خزانہ کی رپورٹ کے مطابق پہلے 10 ماہ میں جولائی تا اپریل ملکی برآمدات 27.8 فیصد اضافے سے 26.9 ارب ڈالر اور ملکی درآمدات 39 فیصد اضافے سے 59.8 ارب ڈالر کی سطح تک پہنچ گئیں جبکہ کرنٹ اکاونٹ خسارے میں 13.8 ارب ڈالر کا اضافہ ریکارڈ کیا گیا۔

رپورٹ کے مطابق براہ راست غیر ملکی سرمایہ کاری 1.6 فیصد کمی سے 1.45 ارب ڈالر رہی۔ پورٹ فولیو سرمایہ کاری منفی رجحان کے ساتھ 473.5 ملین ڈالر ہوچکی ہے۔

مجموعی غیر ملکی سرمایہ کاری 57.1 فیصد کمی کے ساتھ 1570.2 ملین ڈالر تک پہنچ گئی جبکہ زرمبادلہ ذخائر مئی کے تیسرے ہفتے تک 16.108 ارب ڈالر رہے۔

رپورٹ میں کہا گیا کہ اسٹیٹ بینک 10 ارب 02 کروڑ ڈالر، کمرشل بینکوں کے ذخائر 6.08 ارب ڈالر رہے۔ ڈالر کی شرح تبادلہ 201.92 روپے فی ڈالر کی سطح پر پہنچ گئی، 9 ماہ میں ٹیکس ریونیو 28.5 فیصد اضافے سے 4855 ارب روپے رہا۔

جولائی تا مارچ نان ٹیکس آمدنی 15.7 فیصد کمی سے 983 ارب رہی ، جولائی تا اپریل پی ایس ڈی پی کی مد میں 603 ارب روپے منظور کئے گئے۔

جولائی تا مارچ مالیاتی خسارہ بڑھ کر 2566 ارب روپے کی سطح تک پہنچ گیا۔

رپورٹ میں یہ بھی کہا گیا کہ پہلے 9 ماہ میں زرعی قرضے 1.4 فیصد کمی سے 1058 ارب روپے کی سطح پر رہے۔

بڑی صنعتوں کی شرح نمو مارچ میں 26.6 فیصد رہی جبکہ بڑی صنعتوں کی شرح نمو جولائی سے مارچ کے دوران 10.4 فیصد رہی۔

اسٹاک ایکسچینج انڈیکس 42 ہزار 13 پوائنٹس تک پہنچ گیا۔ رپورٹ کے مطابق پہلے 10 ماہ میں ترسیلات زر 7.6 فیصد اضافے سے 26.1 ارب ڈالر ریکارڈ کی گئیں۔

ماہرین معاشیات کے مطابق وزارت خزانہ کی رپورٹ میں مہنگائی کے اعداد و شمار عوام کی مشکلات ظاہر کرتے ہیں۔ نئی حکومت کو چاہئے کہ مہنگائی میں کمی کے لیے اقدامات کرے تاکہ مہنگائی سے پسے طبقے کو ریلیف مل سکے۔