پاکستان سے اعلیٰ تعلیم کیلیے جانیوالی طالبہ حنا بشیر لندن میں قتل

فیصل آباد کے نواحی گاؤں جڑانوالہ سے اعلیٰ تعلیم کیلیے  لندن جانے والی 21 سالہ طالبہ حنا بشیر کو مبینہ طور پر پاکستانی نوجوان نے قتل کردیا۔

لندن میں مقیم پاکستانی صحافی فرید احمد قریشی حنا بشیر کے قتل کی  تفصیلات سامنے لے آئے۔

یہ بھی پڑھیے

نیویارک میں پاکستانی طالبہ پر تیزاب سے حملہ

بلوچستان کی ہونہار طالبہ کی امریکی جامعہ میں داخلے کیلیے چندہ مہم

فرید احمد نے اپنے ٹوئٹر ہینڈل پر شیئر کردہ وڈیو میں بتایا ہے کہ حنا بشیر کو لندن کے علاقے ایلفرڈ کے ایک گھر میں قتل کیا گیا ہے، ان کی لاش قریبی جنگل میں سوٹ کیس سے ملی ہے۔

فرید احمد نے بتایا کہ حنا بشیربہن بھائیوں میں سب سے بڑی تھیں ،وہ لندن سے پی ایچ ڈی کرنا چاہتی تھیں اورکوونٹری یونیورسٹی سے بی ایس کررہی  تھیں۔پاکستانی صحافی نے بتایا کہ 11 جولائی کو حنا کا رابطہ اپنے والدین سے منقطع ہوگیا جس پر انہوں نے لندن میں مقیم اپنے رشتے داروں سے رابطہ کیا جس کے بعد حنا بشیر کی تلاش شروع کی گئی۔

What happened to 21 years old Pakistani student Hina Basheer in London, “she wanted to do PhD and support her family”
P1 pic.twitter.com/leYEFRPWi0

— Farid Ahmed (Qureshi) (@FaridQureshi_UK) July 23, 2022

حنا کی تلاش کے دوران یہ بات سامنے آئی کہ وہ 11 جولائی  کو لاپتہ ہونے سے قبل اپنے دوستوں کے ساتھ تھیں اور انہوں ایلفرڈ لین پر واقع ریسٹورنٹ میں اپنی دوستوں کے ساتھ کھانا کھایا تھا جس کے بعد وہ اپنی دو دوستوں کے ساتھ اپنا سامان لینے مذکورہ فلیٹ آئی تھیں۔

فرید احمد نے بتایا کہ ان کی دوستیں فلیٹ کے باہر ان کا انتظار کررہی تھیں اور کافی دیر تک حنا باہر نہیں آئیں تو انہوں نے دروازہ کھٹکھٹایا جس ایک نوجوان باہر آیا جس نے بتایا کہ حنا یہیں رکیں گی آپ لوگ چلی جائیں۔

پاکستانی صحافی کے مطابق مذکورہ نوجوان کا نام ارسلان تھا جسے حنا بشیر کی دوستوں نےبعد میں شناخت کرلیا۔فرید احمدکے مطابق اتوار 17جولائی کو  پولیس کو نواحی جنگل سے ملنے والے سوٹ کیس سے حنا بشیر کی لاش  ملی جس کے اگلے روز پولیس نے پاکستانی نوجوان ارسلان کو گرفتار کرلیا۔

فرید احمد کے مطابق 26سالہ ملزم ارسلان پر فرد جرم عائد کردی گئی ہے تاہم اس نے پولیس کو کسی قسم کا موقف دینے سے انکار کردیا ہے، ملزم کا ٹرائل آئندہ برس 7 جون کو شروع ہوگا جس میں پولیس تمام ثبوت اور شواہد عدالت کو فراہم  کریگی تاہم جب تک ملزم ریمانڈ پر جیل میں رہے گا۔

مقتولہ حنا بشیر کے والد جڑانوالہ کے معروف گھرانے سے تعلق رکھتے ہیں اور کونسلر منتخب ہوچکے ہیں۔ان کاکہنا ہے کہ ان کی بیٹی اعلیٰ تعلیم حاصل کرکے کچھ بننا چاہتی تھی، مقتولہ کے والد کے مطابق ملزم  کا تعلق بھی انہی کے علاقے سے ہے اور وہ ان کی برادری سے تعلق رکھتا ہے تاہم اس نوجوان کے حوالے سے یہ بات سامنے آئی ہے کہ وہ آئرلینڈ میں مقیم تھا کچھ دن قبل ہی لندن منتقل ہوا تھا۔

Hina Bashir’s father Basheer Khan’s appeal, He wants to take his daughter’s dead body to Pakistan.@CTurnerFCDO https://t.co/UwXyqFdXyF pic.twitter.com/5ZD5BO83Nu

— Farid Ahmed (Qureshi) (@FaridQureshi_UK) July 23, 2022

فرید احمد کے مطابق حنا بشیر کی پوسٹ مارٹم رپورٹ میں وجہ موت نہیں لکھی گئی لیکن لندن پولیس نے  مقتولہ کے رشتیداروں کو بتایا ہے کہ اسکے جسم پر تشدد کے نشانات نہیں پائے گئےتاہم اس کی موت سانس روکے جانے کے باعث واقع ہوئی ہے،ہوسکتا ہے کہ مقتولہ کو گلا دبا کر یا تکیہ کی مدد سے اس کا دم گھوٹا گیا ہو۔

مقتولہ کے والد نےاپنے وڈیو پیغا م میں کہا ہے کہ ان کی بیٹی حنابشیر نومبر 2021 میں کوونٹری یونیورسٹی برطانیہ میں تعلیم حاصل کرنے کیلیےلندن گئی تھی جسے وہاں قتل کردیاگیا ہے تاہم پاکستانی یا برطانوی سفارتخانے نے اس سلسلے میں ان سے کسی قسم کا رابطہ نہیں کیا ہے۔انہوں نے برطانوی حکومت سے مطالبہ کیا ہے کہ انہیں ویزا جاری کیا جائے تاکہ وہ لندن جاکر اپنی بیٹی کی میت واپس لاسکیں۔