حکومت کی الیکشن کمیشن سے فارن فنڈنگ کیس کا فیصلہ جلد سنانے کی درخواست

حکومتی اتحاد میں شامل جماعتوں کے رہنماؤں نے چیف الیکشن کمشنر سے اسلام آباد میں ملاقات کرکے  پی ٹی آئی ممنوعہ فارن فنڈنگ کیس کا فیصلہ جلد سنانے کی درخواست کردی۔

ملاقات میں چاروں صوبوں کے الیکشن کمشنر بھی موجود تھے، حکومتی اتحاد کا موقف تھا کہ پی ٹی آئی کا ممنوعہ فنڈنگ کیس گزشتہ 8 سال سے زیر سماعت ہے اورفیصلہ محفوظ کرنے کے باوجود سنایا نہیں جارہا۔

یہ بھی پڑھیے

فنانشل ٹائمز کا تحریک انصاف اور شریف برادران پر سنگین مالی بے ضابطگیوں کاالزام

الیکشن اکتوبر میں ہونگے،قرنطینہ والے بھی مان گئے ، شیخ رشید

مسلم لیگ نواز کے رہنما اور سابق وزیراعظم شاہد خاقان عباسی کا دیگر رہنماؤں کے ہمراہ چیف الیکشن کمشنر سے ملاقات کے بعد میڈیا سے گفتگو  میں  کہنا تھا کہ اتحادی حکومت کے رہنماؤں کے وفد نے الیکشن کمیشن سے درخواست کی کہ ممنوعہ فارن فنڈنگ کیس کا جلد از جلد فیصلہ کیا جائے۔ الیکشن کمیشن نے کہا کہ فیصلہ کرکے عوام کے سامنے رکھ دیں گے، اگر عمران خان ریکارڈ دیتے تو اب تک فیصلہ آچکا ہوتا۔

شاہد خاقان عباسی نے کہا کہ پی ڈی ایم اور پیپلز پارٹی کے مشترکہ وفد کی چیف الیکشن کمشنر سے ملاقات میں کہا گیا کہ ممنوعہ فنڈنگ کیس 8 سال سے  چل رہا ہے۔ الیکشن کا قانون کہتا ہے کہ کوئی جماعت بیرون ملک کسی شخص سے پیسہ لے تو اسے ظاہر کرنا پڑتا ہے۔

ان کا کہنا تھاکہ اکبر ایس بابر نے  اس کیس کے حوالے سے الیکشن کمیشن کو واضح ثبوت مہیا کئے جب کہ پی ٹی آئی نے اس معاملے میں رکاوٹیں ڈالنے کی کوشش کی ،الیکشن کمیشن پر دباؤ  بھی ڈالا گیا۔پی ٹی آئی نے الیکشن کمیشن کو ریکارڈ مہیا نہیں کیا، جن اکاؤنٹس کا ریکارڈ ملا وہ وہ اسٹیٹ بینک سے ملا  جب کہ پی ٹی آئی نے کہا کہ ان اکاؤنٹس کا پی ٹی آئی کو علم نہیں۔

شاہد خاقان عباسی نے کہا کہ فارن فنڈنگ کیس میں جن اکاؤنٹس کا ریکارڈ ملا وہ وہ اسٹیٹ بینک سے ملا  جب کہ پی ٹی آئی نے کہا کہ ان اکاؤنٹس کا پی ٹی آئی کو علم ہی نہیں۔

شاہد خاقان عباسی نے کہا کہ الیکشن کمیشن کو ہم نےبتایا کہ ثبوت بڑے واضح ہیں،یہ پاکستان کے عوام کا حق ہے کہ انہیں پتا چلے کہ عمران خان کس سے پیسے لیتا رہا۔ان کا کہنا تھا کہ غیر ملکی جریدے فنانشل ٹائمز نے اپنی خبر میں کہاہے  کہ عارف نقوی نے میچز کروائے ، لوگوں سے رقم لے کر کہا کہ یہ پیسے فلاحی کاموں میں خرچ ہوں گے۔ ان پیسوں سے 55 کروڑ کا فنڈ پی ٹی آئی کو دیا گیا ۔ ان کمپنیوں کے پیچھے کون تھے یہ وقت بتائے گا ۔

شاہد خاقان عباسی نے الزام لگایا کہ پاکستان تحریک انصاف کی جانب سے ایسی کمپنیوں سے پیسہ حاصل کیا گیا جن کے مالکان کا پتا نہیں۔ باہر کا پیسہ پاکستان کی سیاست میں استعمال کیا گیا۔ عمران خان نے الیکشن کمیشن سے ریکارڈ چھپایااور اب  الیکشن کمیشن پر حملے کرتا ہے کیونکہ انہیں حقائق کا پتا ہے ۔ عمران خان کی کوشش ہے  کہ ذتی حملے کرکے دباؤ ڈالا جائے۔شاہد خاقان عباسی نے کہا کہ ایک سیاسی جماعت اگر یہودی ایجنٹوں سے پیسے حاصل کرتی ہے تو اس بارے میں پوچھنا ہمارا حق ہے۔