عمران خان کی نااہلی: الیکشن کمیشن نے تحریری فیصلہ جاری کردیا

الیکشن کمیشن آف پاکستان نے تحریک انصاف کے سربراہ عمران خان کے خلاف اپنے فیصلے کا تحریری حکم نامہ جاری کردیا ہے۔

الیکشن کمیشن آف پاکستان کی جو تفصیلی فیصلہ جاری کیا ہے وہ 36 صفحات پر مشتمل ہے۔

توشہ خانہ تحریری فیصلے کی تفصیلات کچھ اس طرح ہیں:

الیکشن کمیشن نے اپنے تحریری فیصلے میں لکھا ہے کہ "عمران خان کے مطابق تحائف 2 کروڑ 15 لاکھ 64 ہزار میں خریدے، جبکہ کابینہ ڈویژن کے مطابق تحائف کی مالیت 10 کروڑ 79 لاکھ 43 ہزار تھی۔”

تحریری فیصلے میں لکھا گیا ہے کہ "عمران خان کے بتائے گئے بنک اکائونٹ کی تفصیلات اسٹیٹ بنک سے منگوائی گئیں، مالی سال 2018-19 کے اختتام پر عمران خان کے اکائونٹ میں 5 کروڑ 16 لاکھ روپے تھے۔”

ای سی پی کے فیصلے کے مطابق "عمران خان کے اکاؤنٹ میں موجود رقم تحائف کی مالیت کی نصف تھی، عمران خان گوشواروں میں کیش اور بنک کی تفصیل بتانے کے پابند تھے جو نہیں بتائی گئی۔’

الیکشن کمیشن کے تحریری فیصلے میں مزید لکھا گیا ہے کہ "عمران خان کے گوشوارے بنک ریکارڈ سے مطابقت نہیں رکھتے، عمران خان نے وضاحت نہیں دی کہ گوشواروں میں غلطی غیرارادی تھی۔

الیکشن کمیشن نے اپنے فیصلے میں تحریر کیا ہے کہ "عمران خان نے تسلیم کیا کہ مالی سال 2019-20 میں تحائف ظاہر کیے نہ فروخت سے حاصل رقم ظاہر کی۔”

ای سی پی نے اپنے فصلے میں مزید لکھا ہے کہ "عمران خان کے بقول تمام تفصیلات ٹیکس گوشواروں میں ظاہر کردہ ہیں، الیکشن کمیشن اور ایف بی آر الگ الگ ادارے ہیں۔”