عمران خان کی لائیو کوریج پر پابندی، لاہور ہائیکورٹ سے پیمرا کو نوٹس جاری

لاہور ہائیکورٹ میں عمران خان کے بیانات ٹی وی چینلز پر نشر نہ کرنے پر پیمرا کے خلاف توہین عدالت کی درخواست پر سماعت ہوئی۔

جسٹس شمس محمود مرزا نے عمران خان کی درخواست پر سماعت کی۔ عدالت نے چیرمین پیمرا کو نوٹس جاری کرتے ہوئے جواب طلب کرلیا۔

عمران خان نے بیرسٹر احمد پنسوتا کے ذریعے توہین عدالت کی درخواست دائر کررکھی ہے۔ درخواست میں چیئرمین پیمرا کو فریق بنایا گیا ہے۔

یہ بھی پڑھیے 

لاہور ہائیکورٹ نے 45267 ایکڑ اراضی کی پاک فوج کو حوالگی روک دی

عمران خان کا اپنے خلاف درج مقدمات کے اخراج کیلئے لاہور ہائی کورٹ سے رجوع

دوران سماعت عدالت نے درخواست گزار کے وکیل سے استفسار کیا کہ آپ کو دستاویزات سے ثابت کرنا ہوگا کہ عدالت کے حکم عدولی ہوئی۔

درخواست میں عمران خان کی جانب سے موقف اختیار کیا گیا ہےکہ لاہور ہائیکورٹ نے پیمرا کی پابندی کا نوٹی فیکیشن معطل کر رکھا ہے۔ نوٹی فیکیشن معطلی کے باوجود ٹی وی چینلز پر نشر نہ کرنا بنیادی حقوق کی خلاف ورزی ہے۔

عمران خان کی جانب سے دائر درخواست میں موقف اختیار کیا گیا ہے کہ پیمرا کی جانب سے ٹی وی چینلز کو عمران خان کی تقاریر نشر نہ کرنے کے لیے پریشرائز کیا جا رہا ہے۔

درخواست میں موقف اختیار کیا گیا ہے کہ پیمرا کی جانب سے عدالتی حکم کی خلاف ورزی کی جا رہی ہے۔ عدالت چیرمین پیمرا کو ذاتی حیثیت میں طلب کرے۔ لاہور ہائیکورٹ چیرمین پیمرا کے خلاف توہین عدالت کی کاروائی عمل میں لائے۔