اسلام آباد ہائی کورٹ سے حلیم عادل شیخ کی حفاظتی ضمانت کی درخواست مسترد

سندھ اسمبلی میں اپوزیشن لیڈر حلیم عادل شیخ کی حفاظتی ضمانت کی درخواست اسلام آباد ہائی کورٹ نے مسترد کردی۔

اسلام آباد ہائی کورٹ کے چیف جسٹس اطہر من اللہ نے درخواست کی سماعت کی اور درخواست گزار وکیل کے دلائل سننے کے بعد درخواست خارج کی۔

یہ بھی پڑھیے

چیئرمین نیب کی تعیناتی پارلیمان کا استحقاق ہے، اسلام آباد ہائی کورٹ

حلیم عادل شیخ کے وکیل نے عدالت سے آج سندھ اسمبلی کے اجلاس کے حوالے سے ضمانت دینے کی استدعا کی تھی۔

چیف جسٹس اطہر من اللہ کا کہنا تھاکہ یہ عدالت پہلے ہی ایک مقدمہ میں حفاظتی ضمانت دے چکی ہے، حلیم عادل شیخ کو تین ہفتے کی حفاظتی ضمانت دی تھی۔ جس کے دوران انہیں متعلقہ عدالت میں پیش ہونا تھا۔

چیف جسٹس نے کہا ہے یہ عدالت سندھ ہائی کورٹ کے دائرہ اختیار میں نہیں جا سکتی، درخواست گزار کو سندھ ہائی کورٹ سے رجوع کرنا چاہیے۔

حلیم عادل شیخ کے وکیل کا موقف تھا کہ سندھ حکومت ان کے موکل کو جھوٹے مقدمات میں گرفتار کرکے آج سندھ اسمبلی کے اجلاس میں شرکت سے روکنا چاہتی ہے۔

اسلام آباد ہائی کورٹ نے حلیم عادل شیخ کے وکیل کے دلائل سننے کے بعد درخواست خارج کردی۔