کاپی رائٹس کے مسائل سے نمٹنے کیلیے ملک کی پہلی میوزک پالیسی تیار

وزیر اطلاعات و نشریات مریم اورنگزیب نے کہا ہے کہ پاکستان میں پائریسی، کاپی رائٹس اور دیگر مسائل سے نمٹنے کے لیے پہلی میوزک پالیسی تیار کر لی گئی ہے۔

وزیراطلاعات  و نشریات نے میوزک پالیسی کے مسودے  کو حتمی شکل دیے جانے  کو  انڈسٹری کے لیے بڑی خبر قرار دیا ہے۔

یہ بھی پڑھیے

شائے گل کا کوک اسٹوڈیو گلوبل سیزن2 میں ترک گلوکار کیساتھ اشتراک

پالیسی کا مسودہ منظوری کے لیے عیدالاضحیٰ کے بعد وفاقی کابینہ کے سامنے پیش کیے جانے کا امکان ہے، کابینہ کی منظوری کے بعد وزارت پالیسی کا نفاذ کرے گی۔

نئی پالیسی موسیقی کی صنعت کے فروغ اور پاکستان میں کاپی رائٹ کے غیر موثر قوانین کے بارے میں اسٹیک ہولڈرز کے خدشات کو دور کرنے کے لیے مراعات اور اقدامات کا خاکہ پیش کرتی ہے۔

وفاقی وزیر نے افسوس کا اظہار کرتے ہوئے کہا کہ 1970 کی دہائی سے موسیقی کی صنعت کے لیے قانون سازی سمیت کوئی بھی پالیسی متعارف نہیں کرائی گئی ہے۔

انہوں نے تسلیم کیا کہ پاکستان اور اس کی موسیقی کی صنعت کو دانشورانہ املاک کی چوری کی وجہ سے نقصان اٹھانا پڑا لیکن نئی پالیسی موسیقی اور موسیقاروں کے حقوق کا مکمل تحفظ کرے گی۔

انہوں نے کہاکہ پالیسی کا مسودہ بین الاقوامی معیارات کے مطابق تیار کیا گیا ہے، اس پالیسی کے ساتھ، فنکاروں کی پبلک پرفارمنس، پیشکش،ڈسٹری بیوشن، موافقت، مدت اور مکینیکل اور کمیونی کیشن کے حقوق کے تحفظ کو قانونی فریم ورک میں لایا گیا ہے۔

مریم اورنگزیب نے کہا کہ اس طرح کے اقدامات کے ذریعے صارفین اور لائسنس حاصل کرنے والوں کا مسئلہ حل ہو جائے گا۔ان کا کہنا تھا کہ موسیقی کو پاکستانی معاشرے کی روح کہا جا سکتا ہے بلکہ یہ ایک قومی اور ثقافتی شناخت ہے جسے نسل در نسل آگے لایا جا رہا ہے۔یہ پالیسی صنعت میں اجارہ داری کو مؤثر طریقے سے ختم کرے گی اور فنکاروں کے بنیادی قانونی حقوق پر احتجاج کرے گی۔

انہوں نے کہا کہ کاپی رائٹس سمیت موسیقی کے اسٹیک ہولڈرز کے تمام مسائل اور مطالبات کو حل کیا جائے گا۔ہ پالیسی میوزک پروڈیوسرز، گلوکاروں، ادیبوں اور نغمہ نگاروں کے حقوق کو قانونی تحفظ فراہم کرے گی، اس کے علاوہ سیلز اور پائریسی سے متعلق انڈسٹری کے دیرینہ مسائل کو حل کرے گی۔

انہوں نے مزید کہا کہ فنکاروں کو متعلقہ قوانین کی فالتو اور فرسودہ دفعات کی وجہ سے ایک طویل عرصے سے جائز اور منصفانہ رائلٹی کے مسئلے کا سامنا ہے۔

انہوں نے کہا کہ کاپی رائٹ آرڈیننس 1962 میں ترمیم کا مقصد کاپی رائٹ بورڈ کو لائسنسنگ اور اسائنمنٹ کے کام کے لیے رائلٹی طے کرنے کے لیے بااختیار بنانا ہے۔