وادی سوات میں پاکستانی ارطغرل کی تیاری؟

اسلامی فتوحات پر مبنی ترک ڈرامہ سیریل ارطغرل غازی سے متاثر ہوکر سوات سے تعلق رکھنے والے پاکستانی نوجوانوں نے ارطغرل غازی کا ری میک بنالیا ہے۔ پاکستانی ارطغرل کے لیے سیٹ، لباس اور ہتھیار تک نوجوانوں نے خود تخلیق کیے ہیں۔

پاکستان میں بلاشبہ ٹیلنٹ کی کمی نہیں ہے اور خیبرپختونخوا کے علاقے سوات کے نوجوانوں نے اس بات کو ثابت بھی کردیا ہے۔ نوجوانوں کی ٹیم نے اپنے محدود وسائل کو بروئے کار لاتے ہوئے ارطغرل غازی کا ری میک بنایا ہے اور جلد اسے ویڈیو شیئرنگ ویب سائٹ یوٹیوب پر نشر کرنے کا ارادہ بھی رکھتے ہیں۔

15  سے 26 سال کی عمر تک کہ ان نوجوانوں نے نہ صرف ارطغرل غازی کا سیٹ تخلیق کیا بلکہ قدیم ترک ملبوسات اور ہتھیار بھی اپنی مدد آپ کے تحت تیار کیے ہیں۔

یہاں یہ بات قابل ذکر ہے کہ  ڈرامہ بنانے سے قبل یہ نوجوان سوات کی ایک دکان میں ارطغرل ڈرامے کی طرز کے ملبوسات اور مختلف اشیاء فروخت کرتے تھے جس پر انہیں نہ صرف پاکستانی عوام بلکہ انڈیا اور افغانستان کے سیاحوں کی جانب سے بھی خوب داد ملی۔ اس پذیرائی کے بعد انہوں نے ڈرامے کا سیٹ تیار کرکے اسے شوٹ کرنے کا فیصلہ کیا تھا۔

یہ بھی پڑھیے

فواد چوہدری پختون ارطغرل کو بھول گئے

پاکستانی ارطغرل میں استعمال ہونے والے ملبوسات، کلھاڑیاں ، تلواریں اور دیگر اشیاء کی فروخت سے حاصل ہونے والی رقم کو ڈرامے کی  شوٹنگ کے لیے استعمال کیا جاتا ہے۔

ترک میڈیا کی جانب سے بھی سوات کے نوجوانوں کی اس کاوش کو سراہا جارہا ہے۔ ڈرامے میں ارطغرل غازی کا کردار نبھانے والے محمد عباس نے ترک اخبار ڈیلی صبا سے گفتگو میں بتایا کہ ڈرامے میں استعمال ہونے والی تمام چیزیں انہوں نے اپنے ہاتھوں سے بنائی ہیں۔

محمد عباس کے مطابق شروعات میں ڈرامے کے چند سین شوٹ کیے تھے لیکن بعد میں ساتھیوں کے ساتھ مل کر پوری سیریز بنانے کا فیصلہ کیا۔ محمد عباس کا کہنا ہے کہ ارطغرل غازی ہمیں ہمارے خوبصورت ماضی سے روشناس کرواتا ہے جس پر ہمیں بہت فخر ہے۔