عشنا شاہ بھی جونی ڈیپ کی حمایت میں سامنے آگئیں

اداکار جونی ڈیپ اور ان کی سابقہ اہلیہ امبر ہیرڈ کے درمیان قانونی جنگ جاری ہے، امبر نے واشنگٹن پوسٹ میں 2018 میں ایک کالم لکھا اور کہا کہ میں گھریلو تشدد کی نمائندگی کرنے والی عوامی شخصیت بن گئی ہوں۔

اس کالم میں جونی ڈیپ کا نام نہیں لکھا تھا لیکن اُن کے وکلا کا خیال تھا کہ یہ بلاواسطہ جونی ڈیپ پر الزام لگایا گیا ہے۔

ریاست ورجینیا کے شہر فیئرفیکس کاؤنٹی میں ٹرائل جاری ہے جسے مکمل ہونے میں کئی ہفتے لگ سکتے ہیں۔

ڈیپ نے عدالت کو بتایا کہ انہوں نے امبر سے بحث ضرور کی ہے لیکن کبھی بھی مارا نہیں، نا ہی زندگی میں کسی عورت کو مارا۔

جونی ڈیپ نے امبر ہیرڈ پر 50 ملین ڈالر کے ہرجانے کا دعویٰ کر رکھا ہے۔

اس کے جواب میں امبر نے جونی پر 100 ملین ڈالر ہرجانے کا دعویٰ دائر کیا ہوا ہے۔

قبل ازیں عدالت میں امبر ہیرڈ نے جونی ڈیپ کی چند تصاویر شیئر کیں جس میں وہ بےخبر سو رہے ہیں۔

امبر نے الزام لگایا کہ جونی اتنا زیادہ نشہ کرتے تھے کہ ان کے ہاتھ میں آئس کریم تھی اور وہ صوفے پر نڈھال سو گئے، پوری آئس کریم پگھل کر کپڑوں پر گر گئی۔

جونی نے اپنے دفاع میں کہا کہ وہ 17 گھنٹے کام کرنے کے بعد واپس آئے تھے اور صوفے پر بیٹھے بیٹھے ہی سوگئے تھے۔

انہوں نے کہا کہ یہ آئس کریم امبر نے بعد میں ان کے ہاتھ میں رکھ کر تصویر کھینچی۔

امبر کی عدالت میں پیش کردہ تصاویر میں جونی ڈیپ کی منشیات کی تھیلیوں اور گولیوں کی بھی تصاویر شامل ہیں۔

جونی ڈیپ نے عدالت میں کہا کہ وہ اچھی اور پرسکون نیند کیلیے قانونی طور پر منظور شدہ نشہ آور اشیا استعمال کرتے تھے۔

اس سارے تناظر میں پاکستانی اداکارہ عشنا شاہ نے کہا کہ خودپرستی بہت خطرناک ہے۔

Narc abuse is such an ugly thing. Leaves trauma for a very long time.
Screw Amber Heard.

— Ushna Shah (@ushnashah) April 22, 2022

عشنا شاہ نے امبر ہیرڈ پر شدید تنقید کی جن کی خودپرستی کی وجہ سے جونی ڈیپ مشکلات میں گھر گئے ہیں۔

جونی ڈیپ کے دفاع میں آئرلینڈ بالڈون نے بھی کہا کہ مجھے معلوم ہے امبر جیسی عورتیں کس قدر شاطر ہوتی ہیں۔

انہوں نے کہا کہ یہ ساری دنیا کو مرد کے خلاف کر دیتی ہیں کیونکہ ہم جس معاشرے میں رہتے ہیں اس میں آدمی برے ہیں۔

آئرلینڈ بالڈون نے کہا کہ امبر ہیرڈ انسان کے نام پر ایک بدترین تباہی اور بربادی ہیں۔

مختلف شخصیات نے بتایا ہے کہ دراصل امبر ہیرڈ خود منشیات استعمال کرتی تھیں اور اب بھی کرتی ہیں اور نشے نے ان پر بہت برے اثرات چھوڑے ہیں۔

امبر نشے کی لت کی وجہ سے اپنے کام پر توجہ نہیں دے پاتیں اور انہیں جونی ڈیپ سے اس بات کی بھی بہت پُرخاش تھی کہ جونی تو کام کو اور گھر کو وقت دے رہے ہیں لیکن میں پیچھے رہ گئی۔