سردیوں کی آمد سے قبل ہی لاہور دنیا کے 5 آلودہ ترین شہروں میں شامل

سردیوں  اور اسموگ کا موسم شروع ہونے سے قبل ہی صوبائی دارالحکومت لاہور دنیا کے 5 آلودہ ترین شہروں کی فہرست میں شامل ہوگیا۔

 نجی ٹی وی کے مطابق دنیا بھر میں ہوا  کےمعیار سے متعلق اعدادو شمارفراہم کرنیوالے ادارے ائیرکوالٹی انڈیکس کے اعدادوشمار کے مطابق گزشتہ ایک ماہ  سے  لاہور دنیا کے 5 آلودہ ترین شہروں کی فہرست میں شامل ہے۔

ماہرین ماحولیات کا کہنا ہے کہ آنیوالے دنوں میں فضائی آلودگی میں ناصرف مزید اضافے کا امکان ہے بلکہ اس انسانی صحت متاثرہونے کے خطرات بڑھتے جارہے ہیں۔

یہ بھی پڑھیے

پاکستان میں ایک تہائی اموات دل کی بیماریوں سے ہوتی ہیں، ڈاکٹر جاوید شیخ

ماہرین ماحولیات سمجھتے ہیں کہ حکومت کے اینٹی اسموگ اسکواڈ محض دکھاوا ہیں، فضاآئی آلودگی کے خاتمے کے لئے ٹھوس ٹرانسپورٹ پالیسی اور غیر معیاری ایندھن کے استعمال پر مکمل پابندی لگانا ہوگی۔

ماہر ماحولیات علیم بٹ کہتے ہیں کہ فضائی آلودگی کی سب سے بڑی وجہ ٹرانسپورٹ کا زہریلا دھواں ہے، 50 فیصد آلودگی اس دھوئیں سے پھیل رہی ہے۔ آلودگی کا 25 فیصد ذمے دار صنعتوں میں استعمال ہونے والا غیرمعیاری ایندھن ہے، اسی طرح زرعی شعبے سے 15 سے 20 فیصد آلودگی پیدا ہوتی ہے۔

انہوں نے کہا کہ لاہور میں بند روڈ پرسیکڑوں ایسے چھوٹے کارخانے ہیں جہاں انتہائی خطرناک ایندھن استعمال کیا جاتا ہے، بعض لوگ گاڑیوں کے پرانے ٹائراستعمال کرتے ہیں جبکہ زیادہ تر کارخانے اب کچرا پلاسٹک کو استعمال کررہے ہیں، پلاسٹک کی بوتلیں، ریپر اور دیگر اشیا کو مشینری کی مدد سے مکس کرکے ایک گولے کی شکل دے دی جاتی ہے اور پھر پلاسٹک کے یہ گولے بطور ایندھن استعمال ہوتے ہیں۔

علیم بٹ کہتے ہیں ان دنوں دن کے وقت آلودگی کی شرح کم جبکہ رات کو زیادہ ہوجاتی ہے، سردیوں میں اسموگ پیدا ہونے اور آلودگی کی شرح بڑھنے کی ایک وجہ موسمیاتی تغیر بھی ہے، سردیوں میں ہوا کم چلتی ہے جس کی وجہ سے فضا میں موجود ذرات کو بکھرنے کا موقع نہیں ملتا اور وہ ہوا میں موجود نمی کا حصہ بن کر اسے مزید کثیف بنادیتے ہیں۔